Tirumala : తిరుమలలో పెరిగిన రద్దీ.. భారీగా సమకూరిన ఆదాయం

తిరుమలకు వచ్చే భక్తులు వివిధ మార్గాల్లో చేరుకుంటుంటారు. ఎప్పటికప్పుడు నెలవారీ టోకెన్లు ఆన్ లైన్ లో టీటీడీ విడుదల చేస్తుంది. అదే సమయంలో కాలినడకన వచ్చి తమ మొక్కులు చెల్లించే భక్తులు అధిక సంఖ్యలో ఉన్నారు. తిరుపతిలో ప్రతి రోజూ ఎస్.ఎస్.డి. టోకెన్లను తీసుకుని తిరుమల శ్రీవారిని దర్శించుకుంటారు. ఇక సర్వదర్శనం క్యూ లైన్ లోకి వచ్చి ఒక్కసారి లైన్ లోకి వెళితే దర్శనమవుతుందని భావించి గంటల తరబడి వేచి చూసే వారు కూడా అనేక మంది ఉంటారు.

ఈరోజు తిరుమలలోని అన్ని కంపార్ట్ మెంట్లు భక్తులతో నిండిపోయాయి. బయట కృష్ణతేజ గెస్ట్ హౌస్ వరకూ భక్తుల క్యూ లైన్ విస్తరించింది. అంటే కిలోమీటర్ కు పైగానే భక్తులు బయట వేచి చూస్తున్నారు. సర్వదర్శనం క్యూ లైన్ లోకి ఉదయం టోకెన్లు లేకుండా ప్రవేశించిన భక్తులకు శ్రీవారి దర్శనం పన్నెండు నుంచి పదిహేను గంటల సమయం పడుతుంది. మూడు వందల రూపాయల ప్రత్యేక దర్శనం టోకెన్లు తీసుకున్న భక్తులకు మూడు గంటల సమయం పడుతుంది. టైమ్ స్లాట్ భక్తులకు ఐదు గంటలకు పైగానే సమయం పడుతుంది. నిన్న తిరుమల శ్రీవారిని 81,483 మంది భక్తులు దర్శించుకున్నారు. వీరిలో 30,777 మంది భక్తులు తమ తలనీలాలను సమర్పించి మొక్కులు చెల్లించుకున్నారు. నిన్న తిరుమల శ్రీవారి హుండీ ఆదాయం 5.12 కోట్ల రూపాయలు వచ్చిందని అధికారులు తెలిపారు.