విదేశీ ఉద్యోగాల పేరుతో మోసం… హైదరాబాద్ వ్యాపారికి రూ.5.4 లక్షల నష్టం

విదేశాల్లో ఉద్యోగాలు కల్పిస్తానని నమ్మబలికి హైదరాబాద్‌కు చెందిన ఓ వ్యాపారిని మోసం చేసిన ఘటన వెలుగులోకి వచ్చింది. మెడ్చల్–మల్కాజిగిరి జిల్లా జవహర్‌నగర్‌కు చెందిన వ్యాపారికి రూ.5,39,999 మోసం చేసినట్లు ఫిర్యాదు నమోదైంది.

పోలీసులు తెలిపిన వివరాల ప్రకారం… కాప్రా బీజేఆర్ నగర్‌కు చెందిన బాల్జ సురేష్‌ (33) బిజినెస్ కన్సల్టెంట్‌గా వ్యాపారం చేస్తున్నారు. సెప్టెంబర్ 9, 2025న తనకు దిల్కుష్ అనే వ్యక్తి ఫోన్ చేసినట్లు సురేష్ పోలీసులకు చెప్పారు. తాను ఉత్తరప్రదేశ్‌లోని గ్రేటర్ నోయిడా వెస్ట్‌లో గౌర్ సిటీ సెంటర్ వద్ద ఉన్న ‘నెక్స్ట్ పాత్ ఓవర్సీస్ కన్సల్టెంట్’ సంస్థలో సీనియర్ వీసా ఇమిగ్రేషన్ సలహాదారుడినని అతడు పరిచయం చేసుకున్నాడు.

జర్మనీ, ఆస్ట్రేలియా, న్యూజిలాండ్ దేశాల్లో ఉద్యోగాలు కల్పిస్తామని చెప్పి ప్రలోభపెట్టాడు. దీంతో రొమేనియాలో పనిచేస్తున్న ఏడుగురికి, హైదరాబాద్‌కు చెందిన మరో వ్యక్తికి జర్మనీలో ఉద్యోగాల అవకాశాలు చూస్తున్నట్లు సురేష్ తెలిపారు.

వారందరి పాస్‌పోర్టులు, రిజ్యూమ్‌లు, విద్యా సర్టిఫికెట్లు పంపాలని నిందితుడు కోరాడు. సురేష్ వాటిని పంపించారు. హైదరాబాద్ అభ్యర్థికి జూమ్ ద్వారా ఇంటర్వ్యూ కూడా నిర్వహించారు. రొమేనియాలో ఉన్న ఏడుగురిని విదేశీ అనుభవం ఆధారంగా ఎంపిక చేసినట్లు నిందితుడు తెలిపాడు. తర్వాత అందరికీ ఈమెయిల్ ద్వారా ఆఫర్ లెటర్లు పంపించాడు.

అనంతరం రొమేనియాలో ఉన్న ఏడుగురి వర్క్ పర్మిట్ ప్రక్రియకు రూ.4,40,000, హైదరాబాద్ అభ్యర్థికి భద్రతా డిపాజిట్‌గా రూ.1,00,000 ఇవ్వాలని కోరాడు. దీంతో మొదట రూ.4,20,000, తర్వాత మరోసారి రూ.1,20,000 సురేష్ బదిలీ చేసినట్లు తెలిపారు.

దాదాపు 15 రోజుల తర్వాత వర్క్ పర్మిట్ ప్రక్రియ గురించి అడిగితే పండుగ సెలవులు, సెలవు తీసుకున్నానని, ఇమిగ్రేషన్ న్యాయవాది అందుబాటులో లేడని చెప్పి నిందితుడు ఆలస్యం చేశాడు. తరువాత ఫోన్ కాల్స్, సందేశాలకు స్పందించకుండా తప్పించుకున్నాడు.

అభ్యర్థులు డబ్బుల గురించి అడిగితే దుర్భాషలాడి తిరిగి ఇవ్వబోనని చెప్పినట్లు సురేష్ ఫిర్యాదులో పేర్కొన్నారు. చివరకు తనను మోసం చేసినట్లు గ్రహించి పోలీసులను ఆశ్రయించానని, మొత్తం రూ.5,39,999 నష్టం జరిగిందని తెలిపారు.