హైదరాబాద్లో నకిలీ ‘FYERS DMA’ ట్రేడింగ్ యాప్ మోసం
₹64 లక్షలకు పైగా నష్టం… రెండు కేసులు నమోదు** లింక్డిన్ ప్రకటనలతో వల… అధిక IPO లాభాల పేరుతో మోసం నకిలీ యాప్, తరచూ మారిన బ్యాంకు ఖాతాలు
హైదరాబాద్: నకిలీ ‘FYERS DMA’ ట్రేడింగ్ యాప్ ద్వారా పెట్టుబడుల పేరుతో మోసం చేసిన ఘటనలో సైబర్బాద్ సైబర్ క్రైమ్ పోలీసులు ఇద్దరు గుర్తుతెలియని వ్యక్తులపై రెండు వేర్వేరు కేసులు నమోదు చేశారు. రాజేంద్రనగర్కు చెందిన ఇద్దరు వ్యక్తులు కలిపి ₹64 లక్షలకు పైగా నష్టపోయినట్లు ఫిర్యాదుల్లో పేర్కొన్నారు.
లింక్డిన్లో వచ్చిన ప్రకటనల ద్వారా స్టాక్ మార్కెట్ శిక్షణ, అధిక లాభాలు వస్తాయని నమ్మించి ‘ఇన్స్టిట్యూషనల్ DMA అకౌంట్’ పేరిట పెట్టుబడులు పెట్టించారని బాధితులు తెలిపారు.
మొదటి ఫిర్యాదు: ₹36.43 లక్షల నష్టం
ఈ కేసులో బండ్లగూడ జాగీర్కు చెందిన ప్రైవేట్ ఉద్యోగి వెంకట ప్రసాంత్ దామెర (48) అక్టోబర్ 7, 2025న ‘FYERS DMA’ ప్లాట్ఫారమ్లో చేరినట్లు పోలీసులకు చెప్పారు.
గోపాల్ కావలిరెడ్డి అని పరిచయం చేసుకున్న వ్యక్తి, నైనా వర్మ అనే మహిళ తనను సంప్రదించారని తెలిపారు. ‘FYERSDMA’ పేరుతో యాప్ డౌన్లోడ్ చేయించి, ట్రేడింగ్ పేరుతో పలువురు బ్యాంకు ఖాతాలకు డబ్బులు పంపించాలని సూచించినట్లు చెప్పారు.
అక్టోబర్ నుంచి డిసెంబర్ 2025 మధ్యలో యాక్సిస్ బ్యాంక్, ఐసీఐసీఐ, ఎస్బీఐ ఖాతాల నుంచి మొత్తం ₹39.75 లక్షలు బదిలీ చేసినట్లు తెలిపారు. తిరిగి ₹3.81 లక్షలు మాత్రమే వచ్చాయని పేర్కొన్నారు. యాప్లో ₹2.01 కోట్లకు పైగా లాభం చూపిస్తూ, ఖాతా అన్ఫ్రీజ్ పేరిట మరో ₹51 లక్షలు చెల్లించాలని ఒత్తిడి చేశారని తెలిపారు. అనుమానం వచ్చి పోలీసులను ఆశ్రయించడంతో తన నష్టం ₹36.43 లక్షలుగా తేలిందన్నారు.
రెండో ఫిర్యాదు: ₹27.98 లక్షల నష్టం
రాజేంద్రనగర్కు చెందిన మరో ప్రైవేట్ ఉద్యోగి పీఎస్వీ సన్యాసి రాజు (48) డిసెంబర్ 4, 2025న లింక్డిన్ ప్రకటన చూసి అదే ప్లాట్ఫారమ్లో చేరినట్లు చెప్పారు.
డిసెంబర్ 4 నుంచి 29 మధ్యలో Aeques, KSH International Ltd వంటి IPOల పేరుతో పలువురు ఖాతాలకు మొత్తం ₹33.50 లక్షలు బదిలీ చేసినట్లు తెలిపారు. తిరిగి ₹5.51 లక్షలు మాత్రమే వచ్చాయని, యాప్లో ₹52 లక్షలకు పైగా లాభం చూపించినట్లు పేర్కొన్నారు. డబ్బులు ఉపసంహరించుకోవాలంటే ‘బ్రోకరేజ్ చార్జీలు’ అంటూ మరో ₹10.41 లక్షలు చెల్లించాలని చెప్పడంతో మోసమని గ్రహించినట్లు తెలిపారు. ఈ ఘటనలో తన నష్టం ₹27.98 లక్షలుగా ఉందన్నారు.
నకిలీ యాప్… తప్పుడు హామీలు
ఈ రెండు ఘటనల్లోనూ ఆపిల్ యాప్ స్టోర్ లింక్ ద్వారా నకిలీ ట్రేడింగ్ యాప్ అందుబాటులో ఉంచినట్లు, తరచూ మారే బ్యాంకు ఖాతాల ద్వారా డబ్బులు మళ్లించినట్లు పోలీసులు తెలిపారు. జీరో కమిషన్, సులభ ఉపసంహరణలు అంటూ హామీలు ఇచ్చి, ఖాతా పరిమితులు, నాన్-పర్ఫార్మెన్స్ పేరుతో మరిన్ని నిధులు తెచ్చేందుకు ఒత్తిడి చేసినట్లు దర్యాప్తులో తేలిందన్నారు.
పోలీసులు కేసులు నమోదు చేసి దర్యాప్తు కొనసాగిస్తున్నారు
