Road Accident : నిద్రలోనే బతుకులు తెల్లారి పోయాయి...అతి వేగమే అసలు కారణమా?

కర్నూలు జిల్లాలోని చిన్నటేకూరు వద్ద శుక్రవారం తెల్లవారుజామున హైదరాబాద్‌–బెంగళూరు వెళ్తున్న ప్రైవేట్‌ బస్సు ఈ ప్రమాదానికి గురయింది. అయితే ఈ బస్సును వెంటనే డ్రైవర్ నిలపకుండా వేగంగా పోనివ్వడంతో మంటలు మరింత వేగంగా అంటుకున్నాయని తెలిపారు. ఇది పూర్తిగా డ్రైవర్ నిర్లక్ష్యమేనని ప్రమాదం నుంచి బయటపడిన ప్రయాణికులు చెబుతున్నారు. హైదరాబాద్ నుంచి కర్నూలుకు వెళ్లే ఈ బస్సులో మొత్తం 43 మంది ప్రయాణికులున్నారు. వీరిలో ఇరవై మంది వరకూ మరణించారు. డ్రైవర్, క్లీనర్ తప్పించుకోవడంతో అసలు కారణం తెలియరాలేదు. అతివేగం, నిర్లక్ష్యం ఇందరి ప్రాణాలను తీసింది. బస్సు నుంచి 23 మంది ప్రయాణికులు సురక్షితంగా బయటపడ్డారు. బైక్ పై వెళుతున్న వ్యక్తి కూడా చనిపోయాడు.

ప్రమాదం నుంచి బయటపడిన ప్రయాణికులు ఇంకా ఈ ఘటన నుంచి తేరుకోలేకపోతున్నారు. బయటపడిన వారిలో సుబ్రమణ్యం, జయసూర్య, రమేష్, అకీర, జస్మిత, అఖిల్, నవీన్ కుమార్, శ్రీలక్ష్మి, సత్యనారాయణ, వేణుగోపాల్ రెడ్డి, రామిరెడ్డితో పాటు హిందూపూర్ కు చెందిన నవీన్ ప్రాణాలతో బయటపడ్డారు. పుట్టపర్తి నుంచి హైదరాబాద్ వస్తున్న హైమారెడ్డి బస్సులో మంటలు చెలరేగడాన్ని చూసిన తర్వాత ఆమె అందించిన సమాచారం మేరకు పోలీసులు వెంటనే ఘటన స్థలికి చేరుకుని సహాయక చర్యలు చేపట్టారు. ప్రాణాలతో ఉండి గాయపడిన వారిని కర్నూలు జిల్లా ఆసుపత్రికి తరలించి చికిత్స అందిస్తున్నారు. బాధితుల్లో ఇద్దరు చిన్నారులు కూడా ఉన్నారని చెబుతున్నారు.