టెన్త్ విద్యార్థి హత్య కేసులో సంచలన విషయాలు

అమర్నాథ్ హత్య కేసులో సంచలన విషయాలు వెలుగులోకి వచ్చాయి. పెట్రోలు దాడిలో తీవ్రంగా గాయపడిన బాలుడిని ఆసుపత్రికి తరలిస్తున్న సమయంలో వెంకటేశ్వర్‌రెడ్డి పేరును చెప్పాడు. ఆ తర్వాత కాసేపటికే మృతి చెందాడు. బాలుడు పేర్కొన్న వెంకటేశ్వర్‌రెడ్డి.. బాధిత బాలుడు అమర్నాథ్‌రెడ్డి సోదరిని పలుమార్లు వేధించాడని విచారణలో తెలిసింది. విషయం తెలిసిన అమర్నాథ్ రెండు నెలల క్రితం వెంకటేశ్వర్‌రెడ్డిని నిలదీశాడు. ఇంకోసారి అలా చేస్తే బాగుండదని హెచ్చరించాడు. దీంతో బాలుడిపై కక్ష పెంచుకున్న వెంకటేశ్వర్‌రెడ్డి స్నేహితులతో కలిసి రెండుసార్లు బాలుడిపై దాడిచేశాడు. తనపై దాడి విషయాన్ని అమర్నాథ్ వెంకటేశ్వర్‌రెడ్డి కుటుంబ సభ్యులు, గ్రామ పెద్దల దృష్టికి తీసుకెళ్లాడు. దీంతో అమర్నాథ్‌పై మరింత కక్ష పెంచుకున్న నిందితుడు మరో ముగ్గురు స్నేహితులతో కలిసి సైకిలుపై ట్యూషన్ నుంచి వస్తున్న బాలుడిని అడ్డగించి కొట్టాడు. ఆ తర్వాత కాళ్లు కట్టేసి పెట్రోలు పోసి తగలబెట్టాడు. బాలుడి తల్లి ఫిర్యాదు మేరకు వెంకటేశ్వర్‌రెడ్డితో పాటు మరో ముగ్గురిపై కేసు నమోదు చేశారు.