Jakia Khanam : జకియా ఖానం యూటర్న్ వెనక ఇంత కథ నడిచిందా?

జకియా ఖానం రాయచోటిలో సాధారణ పార్టీ కార్యకర్త మాత్రమే. అయితే జగన్ జకియా ఖానంకు ఎమ్మెల్సీగా అవకాశం ఇచ్చారు. కడప జిల్లా కావడంతో పాటు జగన్ సొంత జిల్లాకు చెందిన వారు కావడంతో జకియా ఖానంకు ఎమ్మెల్సీ పదవి లభించింది. జకియా ఖానంను కేవలం ఎమ్మెల్సీతో సరిపెట్టలేదు. ఆమెను శాసనమండలి డిప్యూటీ ఛైర్మన్ గా కూడా చేశారు. నిజానికి జకియా ఖానం రాజకీయ జీవితంలో ఆ పదవి కూడా బహుశా ఊహించి ఉండరు. జకియా ఖానం వైసీపీ నుంచి బయటకు వచ్చి టీడీపీలో చేరాలని ప్రయత్నించినా ఆమెను చేర్చుకోలేదు. మరొకవైపు ఆమె తప్పనిసరి పరిస్థితుల్లో బీజేపీలో చేరినట్లు కనిపిస్తుంది. అయితే బీజేపీలో కూడా ఆమెకు పెద్దగా ప్రాధాన్యత దక్కినట్లు కనిపించకపోవడంతో జకియా ఖానం పునరాలోచనలో పడ్డారంటున్నారు.

జనసేనలో చేరాలనుకున్నా జకియా ఖానంకు వీలు కాలేదు. రాజకీయంగా తనకు ఉన్నత పదవి ఇవ్వడమే కాకుడా తనను ఆదరించిన వైసీపీలోనే ఉండటం మంచిదని భావించారా? లేక తన రాజీనామాను శాసనమండలి ఛైర్మన్ ఆమోదిస్తే ఆ పదవి తనకు దక్కదని అనుకున్నారా? అన్నది తెలియదు. మరొకవైపు వైసీపీ అధినేత జగన్ సొంత జిల్లా కావడంతో పాటు సామాజికవర్గం నుంచి కొంత వత్తిడిని జకియా ఖానం ఎదుర్కొంటున్నట్లు ప్రచారం జరుగుతుంది. అందుకే జకియా ఖానం తన రాజీనామాను ఉపసంహరించుకుంటున్నానని చెప్పారని అంటున్నారు. వైసీపీకి కూడా ప్రస్తుతం అవసరం కాబట్టి మౌనంగానే ఈ పరిణామాలను చూస్తుందన్న విశ్లేషణలు వినిపిస్తున్నాయి.