సింగయ్య మృతి కేసులో నిందితుడిగా వైఎస్ జగన్

చీలి సింగయ్య మృతి కేసులో మాజీ ముఖ్యమంత్రి వైఎస్ జగన్ మోహన్ రెడ్డిని నిందితుడిగా చేర్చారు. ఈ విషయాన్ని గుంటూరు ఎస్పీ సతీష్ కుమార్ ఆదివారం రాత్రి మీడియా ముందు వెల్లడించారు. ఈ సంఘటన జూన్ 18న గుంటూరు నగర శివార్లలోని ఏటుకూరు గ్రామ సమీపంలో జరిగింది. ఏడాది క్రితం ఆత్మహత్య చేసుకుని మరణించిన వైఎస్ఆర్సీ కార్యకర్త కుటుంబాన్ని పరామర్శించడానికి జగన్ మోహన్ రెడ్డి సత్తెనపల్లికి వెళ్లారు. ఆ సమయంలోనే ఈ ప్రమాదం జరిగింది. ఈ కేసులో వాహనం నడిపిన డ్రైవర్ రమణారెడ్డి, మాజీ ముఖ్యమంత్రి జగన్, అలాగే కాన్వాయ్‌లో ఉన్నట్లుగా భావిస్తున్న నాగేశ్వర్ రెడ్డి, సుబ్బారెడ్డి, మాజీ మంత్రులు పేర్ని నాని, విడదల రజనిలను కూడా నిందితుల జాబితాలో చేర్చినట్లు ఎస్పీ తెలిపారు.