Ys Jagan : బిల్డప్ బాబు ముఖారవిందాన్ని చూసి గూగుల్ విశాఖకు వచ్చిందా?

చంద్రబాబు వ్యవహారం పెరఫెర్మాన్స్ లో వీక్.. క్రెడిట్ లో పీక్ లా ఉందని వైఎస్ జగన్ తెలిపారు. చంద్రబాబు మాటలు కోటలు దాటుతున్నాయని జగన్ అన్నారు. 2020లోనే విశాఖలో అదానీ డేటా సెంటర్ కు బీజం పడిందని జగన్ తెలిపారు. నాడే కేంద్ర ప్రభుత్వం జోక్యం చేసుకుని గూగుల్ ను ఇక్కడకు తీసుకు వచ్చే కార్యక్రమం ప్రారంభమయిందని చెప్పడానికి చంద్రబాబు ఇష్టపడకపోవడం వల్లనే అదానీ పేరును బయటకు రానివ్వలేదన్నారు. డేటా సెంటర్ కు అదానీ 82 వేల కోట్ల రూపాయలు ఖర్చు పెడుతున్నారని జగన్ తెలిపారు. సింగపూర్ నుంచి 3,900 కిలోమీటర్ల దూరంలో ఉన్న విశాఖకు సముద్ర గర్భంలో కేబుల్ వేసుకు రావాలని జగన్ వివరించారు. ఈయన సుందర ముఖారవిందాన్ని చూసి గూగుల్ వచ్చిందని బిల్డప్ చంద్రబాబు ఇస్తున్నాడని అన్నారు.

డేటా సెంటర్ వల్ల వచ్చే ఉపాధి అవకాశాలు తక్కువని అన్నారు. భవిష్యత్ లో జరిగే మార్పునకు డేటా సెంటర్ ముఖ్య భూమిక అని జగన్ అన్నారు. రిక్రియేషన్ సెంటర్, ఐటీ పార్క్, స్కిల్ సెంటర్ పెట్టాలని నాడు అదానీతో ఒప్పందాన్ని కుదుర్చుకున్నామని జగన్ తెలిపారు. దీనివల్ల ఇరవై ఐదు వేల ఉద్యోగాలు వస్తాయని జగన్ చెప్పారు. హైదరాబాద్ ను తానే అభివృద్ధి చేసుకుంటున్నానని చెప్పానని అన్నారు. 1999లో గెలిచిన చంద్రబాబు తర్వాత అక్కడ చంద్రబాబు గెలవనే లేదన్నారు. రెండుసార్లు కాంగ్రెస్ ప్రభుత్వం, రెండు సార్లు కేసీఆర్ ప్రభుత్వం వచ్చిందని జగన్ చెప్పారు. ఇతర ముఖ్యమంత్రులు చేసిన దానికి కూడా చంద్రబాబు క్రెడిట్ ఇవ్వలేదని జగన్ అన్నారు. వైఎస్ రాజశేఖర్ రెడ్డి, కేసీఆర్ పాలన వల్ల ఐటీలో ఎగుమతులు పెరిగాయని జగన్ అన్నారు. చంద్రబాబు ఉన్నప్పుడు ఐటీ ఆదాయం ఐదువేల ఆరువందల కోట్లయితే, ఇప్పుడు రెండు లక్షల కోట్లు దాటిందనడానికి కారణమెవరు? అని జగన్ ప్రశ్నించారు.