Rain Alert: ఆంధ్రప్రదేశ్‌లోని పలు ప్రాంతాలకు భారీ వర్ష సూచన

అనకాపల్లి, కాకినాడ, కోనసీమ, తూర్పుగోదావరి, పశ్చిమగోదావరి, ఏలూరు జిల్లాల్లో శుక్రవారం భారీ నుంచి అతి భారీ వర్షాలు కురిసే అవకాశం ఉందని ఆంధ్రప్రదేశ్ రాష్ట్ర విపత్తు నిర్వహణ సంస్థ అధికారులు తెలిపారు. కోస్తాంధ్ర, యానాం, రాయలసీమ మీదుగా గంటకు 30 నుండి 40 కి.మీ వేగంతో బలమైన ఉపరితల గాలులు వీచే అవకాశం ఉందని శుక్రవారం ఒక ప్రకటనలో వాతావరణ శాఖ తెలిపింది. సెప్టెంబర్ 2న కూడా పలు ప్రాంతాల్లో మెరుపులు, ఉరుములతో కూడిన వర్షం పడే అవకాశం ఉంది. బంగాళాఖాతంలో ఏర్పడిన అల్పపీడనం కారణంగా ఏపీలోని పలు జిల్లాల్లో భారీ నుంచి అతి భారీ వర్షాలు కురిసే అవకాశం ఉందని వాతావరణ శాఖ స్పష్టం చేసింది. దీంతో ప్రభుత్వం అధికారులను అప్రమత్తం చేసింది.