Tirumala : తిరుమలలో నేడు భక్తుల రద్దీ చూస్తే గోవిందా అనాల్సిందే

శ్రీవారి సేవకుల ద్వారా తిరుమలలో తాగునీటిని కూడా అన్ని చోట్ల ఏర్పాటు చేశారు. వేసవి తీవ్రత ఎక్కువగా ఉండటంతో మంచినీటి కోసం జనం ఇబ్బందులు పడకుండా తగిన జాగ్రత్తలు తీసుకుంటున్నారు. భక్తులు గుమికూడే అన్ని చోట్లా ప్రత్యేకంగా ఏర్పాట్లను తిరుమల తిరుపతి దేవస్థానం అధికారులు చేపట్టారు. కంపార్ట్ మెంట్లన్నీ భక్తులతో కిటకిట లాడుతుండటంతో వేడిని తగ్గించేందుకు ఎయిర్ కూలర్లను ఏర్పాటు చేశారు. రద్దీ ఎక్కువగా ఉన్న సమయంలో వత్తిడికి లోనయి ఎలాంటి ఆరోగ్యపరమైన ఇబ్బందులు కలగకుండా ఉండేందుకు వైద్యులను కూడా అందుబాటులో ఉంచారు.

ఈరోజు తిరుమలలోని వైకుంఠం క్యూ కాంప్లెక్స్ లోని 23 కంపార్ట్ మెంట్లలో భక్తులు శ్రీవారి దర్శనం కోసం వేచి ఉన్నారు. ఉచిత దర్శనం కోసం ఈరోజు ఉదయం ఏడున్నర గంటలకు టోకెన్లు లేకుండా ప్రవేశించిన భక్తులకు శ్రీవారి దర్శనం పద్దెనిమిది గంటల సమయం పడుతుందని తిరుమల తిరుపతి దేవస్థానం అధికారులు తెలిపారు. టైమ్ స్లాట్ దర్శనం భక్తులకు ఐదు గంటలకు దర్శన సమయం పడుతుందని, మూడు వందల రూపాయల ప్రత్యేక దర్శనం టిక్కెట్లు కొనుగోలు చేసిన భక్తులకు శ్రీవారి దర్శనం మూడు నుంచి నాలుగు గంటల సమయం పడుతుదని అధికారులు వెల్లడించారు. నిన్న తిరుమల శ్రీవారి హుండీ ఆదాయం 3.80 కోట్ల రూపాయలు వచ్చిందని టీటీడీ అధికారులు తెలిపారు.