Maha Nadu : నేటి నుంచి మహానాడు ప్రారంభం.. మూడు రోజులు పసుపు పండగ

ఇక పార్టీ కోసం జాతీయ పార్టీ అధ్యక్షుడి ఎన్నిక కోసం నోటిఫికేషన్ ను కూడా విడుదల చేయనున్నారు. మహానాడును ప్రారంభించే ముందు పార్టీ వ్యవస్థాపకుడు ఎన్టీఆర్ కు ఘన నివాళులర్పించిన అనంతరం పార్టీ జెండాను చంద్రబాబు ఆవిష్కరిస్తారు. అనంతరం ఒక్కొక్కొ అంశంపై ఎంపిక చేసిన నాయకులు ప్రసంగాలు ఉంటాయి. తొలి ప్రసంగంతో పాటు ముగింపు ప్రసంగం కూడా చంద్రబాబు చేయనున్నారు. ఈరోజు ఉదయం 8.30 గంటలకు ప్రతినిధులు నమోదుతో మహానాడు కార్యక్రమం ప్రారంభం కానుంది. అనంతరం పార్టీ కోసం పనిచేసి మరణించిన కార్యకర్తలు, నేతలకు మహానాడు వేదికగా సంతాపాన్ని ప్రకటించనున్నారు.

అనంతరం పార్టీ ప్రధాన కార్యదర్శి నివేదికను మహానాడు ప్రాంగణంలో సమర్పిస్తారు. పార్టీ రాష్ట్ర అధ్యక్షుడు పల్లా శ్రీనివాసరావు తొలుత స్వాగతోపన్యాసం చేయనున్నారు. ట్రెజరర్ పార్టీ ఖర్చులు, ఆదాయాలను సభ ముందు ఉంచుతారు. అనంతరం చంద్రబాబు ప్రారంభోపన్యాసం చేయనున్నారు. తర్వాత టీడీపీ మౌలిక సిద్ధాంతాలపై చర్చించనున్నారు. మూడు సార్లు ఒకే పదవి చేసిన వారిని అంతకన్నా పెద్ద పదవికి పంపాలన్న నిర్ణయంపై కూడా చర్చ జరగనుంది. ఇక కార్యకర్తే అధినేత, యువగళం అంశంపై కూడా చర్చ జరుగుతుంది. దీంతో పాటు కార్యకర్తల సంక్షేమం కోసం చేపట్టాల్సిన కార్యక్రమాలను గురించి కూడా మహానాడులో సమీక్షించనున్నారు. రెండో రోజు జాతీయ పార్టీ అధ్యక్షుడి ఎన్నిక ఉంటుంది. అనేక తీర్మానాలుచేసిన తర్వాత మూడో రోజు ఐదు లక్షల మందితో భారీ బహిరంగ సభను నిర్వహించనున్నారు.