Tirumala : తిరుమలలో కంపార్ట్ మెంట్లన్నీ నిండిపోయి...క్యూ లైన్ ఎంత పొడవు ఉందంటే?

ఇప్పటికే జులై నెల దర్శనం టిక్కెట్లు కూడా ఆన్ లైన్ లో విడుదల అవుతుండటంతో అవి కూడా హాట్ కేకుల్లా అమ్ముడుపోతున్నాయి. భక్తులు ఎక్కువగా మంచినీటి కోసం ఇబ్బంది పడకుండా ఎక్కడికక్కడ తిరుమలలో జలప్రసాదాన్ని ఏర్పాటు చేశారు. చల్లని మంచి నీటిని అందిస్తున్నారు. అలాగే క్యూ లైన్ లో ఉన్న వారికి మజ్జిగ, మంచినీళ్లు, అన్న ప్రసాదాలను కూడా శ్రీవారి సేవకులు సరఫరా చేస్తున్నారు. జూన్ నెలాఖరు వరకూ రద్దీ ఇలాగే ఉంటుందని అంచనా వేసిన తిరుమల తిరుపతి దేవస్థానం అధికారులు ఈ మేరకు ముందస్తు ఏర్పాట్లు చేసుకుంటున్నారు.

ఈరోజు తిరుమలలోని అన్ని కంపార్ట్ మెంట్లన్నీ భక్తులతో నిండిపోయాయి. భక్తులు కంపార్ట్ మెంట్లు నిండిపోయి బయట కృష్ణ తేజ గెస్ట్ హౌస్ వరకూ క్యూ లైన్ విస్తరించి ఉంది. ఉచిత దర్శనం క్యూ లైన్ లోకి ఉదయం ఏడున్నర గంటలకు టోకెన్లు లేకుండా ప్రవేశించి వేచి ఉన్న భక్తులకు శ్రీవారి దర్శనం పద్దెనిమిది గంటల సమయం పడుతుందని తిరుమల తిరుపతి దేవస్థానం అధికారులు తెలిపారు. టైమ్ స్లాట్ దర్శనం భక్తులకు ఐదు గంటలకు పైగానే సమయం పడుతుంది. మూడు వందల రూపాయల ప్రత్యేక దర్శనం టిక్కెట్లను కొనుగోలు చేసిన భక్తులకు మూడు నుంచి నాలుగు గంటల సమయం పడుతుంది. నిన్న తిరుమల శ్రీవారిని 78,821 మంది భక్తులు దర్శించుకున్నారు. నిన్న 33,568 మంది భక్తులు తలనీలాలను సమర్పించుకున్నారు. నిన్న తిరుమల శ్రీవారి హుండీ ఆదాయం 3.36 కోట్ల రూపాయలు వచ్చిందని అధికారులు తెలిపారు.