Tirumala : మంగళవారం కూడా తిరుమలలో భక్తుల క్యూ లైన్ చూశారా?

దీంతో తిరుమల వీధులన్నీ భక్తులతో కిటకిటలాడిపోతున్నాయి. హోటళ్లలో రద్దీ పెరిగింది. గత నెల రోజుల నుంచి భక్తుల రద్దీ కొనసాగుతుండటంతో అవసరమైన చర్యలను తిరుమల తిరుపతి దేవస్థానం అధికారుల ప్రారంభించారు. ప్రధానంగా క్యూ లైన్లలో గంటల తరబడి వేచి ఉండే భక్తులకు అవసరమైన అన్నప్రసాదాలను అందిస్తున్నారు. వైద్యం కోసం అత్యవసర ఏర్పాట్లను కూడా చేశారు. దర్శనం సులువుగా, వీలయినంత త్వరగా పూర్తి అయ్యేలా చర్యలు తీసుకుంటున్నామని అధికారులు తెలిపారు.

ఈరోజు తిరుమలలోని వైకుంఠం క్యూ కాంప్లెక్స్ లోని అన్ని కంపార్ట్ మెంట్లు భక్తులతో నిండిపోయాయి. ఏటీజీ హెచ్ వరకూ భక్తుల క్యూ లైన్ విస్తరించింది. అంటే దాదాపు కిలోమీటర్ నుంచి రెండు కిలోమీటర్ లైను ఉంటుంది. ఉచిత దర్శనం క్యూ లైన్ లోకి ఈరోజు ఉదయం టోకెన్లు లేకుండా ప్రవేశించిన భక్తులకు శ్రీవారి దర్శనం పద్దెనిమిది గంటల సమయం పడుతుందని తిరుమల తిరుపతి దేవస్థానం అధికారులు తెలిపారు. టైమ్ స్లాట్ దర్శనం భక్తులకు ఆరు గంటలకు పైగానే సమయం పడుతుంది. మూడు వందల రూపాయల ప్రత్యేక దర్శనం టిక్కెట్లు కొనుగోలు చేసిన భక్తులకు శ్రీవారి దర్శనం మూడు నుంచి నాలుగు గంటల సమయం పడుతుంది. నిన్న తిరుమల శ్రీవారిని 84,681 మంది భక్తులు దర్శించుకున్నారు. శ్రీవారి హుండీ ఆదాయం 4.43 కోట్ల రూపాయలు వచ్చినట్లు అధికారులు తెలిపారు.