Tirumala : తిరుమలకు పోటెత్తిన భక్తులు.. ఈరోజు దర్శన సమయం ఎంతంటే?

తిరుమల తిరుపతి దేవస్థానం కీలక నిర్ణయం తీసుకుంది, ఈ నెల 15, 16 తేదీల్లో వీఐపీ బ్రేక్ దర్శనాలను రద్దు చేసింది. కోయిల్ ఆళ్వార్ తిరుమంజసం, ఆణివారం ఆస్థానం సందర్భంగా ఈ నిర్ణయాన్ని తీసుకున్నట్లు అధికారులు తెలిపారు.మంగళవారం ఉదయం ఆరు గంటలకు తిరుమంజనం ప్రారంభిస్తారు. మధ్యాహ్నం పన్నెండు గంటల నుంచి శ్రీవారి చెంతకు భక్తులను అనుమతిస్తారు. ఈ రెండు రోజుల పాటు వీఐపీ బ్రేక్ దర్శనాలు ఉండవని, దానికి అనుగుణంగా ఉండాలని టీటీడీ అధికారులు సూచించారు.

ఈరోజు తిరుమలలోని వైకుంఠం క్యూ కాంప్లెక్స్ లోని ఇరవై తొమ్మిది కంపార్ట్ మెంట్లలో భక్తులు శ్రీవారి దర్శనం కోసం వేచి ఉన్నారు. ఉచిత దర్శనం క్యూ లైన్ లోకి ఉదయం టోకెన్లు లేకుండా ప్రవేశించిన భక్తులకు శ్రీవారి దర్శనం ఇరవై గంటల సమయం పడుతుందని తిరుమల తిరుపతి దేవస్థానం అధికారులు తెలిపారు. టైమ్ స్లాట్ దర్శనం భక్తులకు శ్రీవారి దర్శనం ఆరు గంటలకు పైగానే సమయం పడుతుంది. మూడు వందల రూపాయల ప్రత్యేక దర్శనం టిక్కెట్లు కొనుగోలు చేసిన భక్తులకు శ్రీవారి దర్శనం నాలుగు గంటల నుంచి ఐదు గంటల సమయం పడుతుంది. నిన్న తిరుమల శ్రీవారిని 76,501 మంది భక్తులు దర్శించుకున్నారు. వీరిలో 29,033 మంది భక్తులు తమ తలనీలాలను సమర్పించి మొక్కులు చెల్లించుకున్నారు. నిన్న తిరుమల శ్రీవారి హుండీ ఆదాయం 4.39 కోట్ల రూపాయలు వచ్చిందని అధికారులు వెల్లడించారు.