Tirumala : తిరుమలలో తగ్గని రష్.. అసలు రీజన్ ఇదేనట

సాధారణంగా శుక్ర, శని, ఆదివారాల్లో మాత్రమే భక్తుల రద్దీ ఎక్కువగా ఉంటుంది. కానీ ఇప్పుడు వారాలతో సంబంధం లేకుండా భక్తులు తిరుమలకు తరలివస్తున్నారు. విద్యాసంస్థలు ప్రారంభమయినా సరే భక్తులు రద్దీ ఏ మాత్రం తగ్గడం లేదు. ముందుగా ప్రత్యేక దర్శనం టిక్కెట్లు బుక్ చేసుకున్న వారితో పాటు కాలి నడకన మొక్కులు చెల్లించుకునే భక్తులతో తిరుమలలో భక్తుల రద్దీ ఎక్కువగా ఉంది. కంపార్ట్ మెంట్లన్నీ నిండి పోయి బయట వరకూ క్యూలైన్లు గత కొద్ది రోజులుగా విస్తరించి ఉన్నాయి.

ఈరోజు తిరుమలలోని వైకుంఠం క్యూ కాంప్లెక్స్ లోని అన్ని కంపార్ట్ మెంట్లు భక్తులతో నిండిపోయాయి. బయట ఎన్.జి. షెడ్ల వరకూ భక్తుల క్యూ లైన్ విస్తరించింది. ఉచిత దర్శనం క్యూ లైన్ లోకి ఉదయం టోకెన్లు లేకుండా ప్రవేశించిన భక్తులకు శ్రీవారి దర్శనం ఇరవై గంటల సమయం పడుతుందని తిరుమల తిరుపతి దేవస్థానం అధికారులు తెలిపారు. టైమ్ స్లాట్ దర్శనం భక్తులకు ఆరు గంటలకుపైగానే సమయం పడుతుంది. మూడు వందల రూపాయల ప్రత్యేక దర్శనం టిక్కెట్లు కొనుగోలు చేసిన భక్తులకు శ్రీవారి దర్శనం నాలుగు నుంచి ఐదు గంటల సమయం పడుతుంది. నిన్న తిరుమల శ్రీవారిని 80,081 మంది భక్తులు దర్శించుకున్నారు. వీరిలో 28,775 మంది భక్తులు తలనీలాలను సమర్పించుకున్నారు. నిన్న తిరుమల శ్రీవారి హుండీ ఆదాయం 4.48 కోట్ల రూపాయల ఆదాయం వచ్చిందని అధికారులు వెల్లడించారు.