Tirumala : తిరుమలలో భక్తుల రద్దీ ఆదివారం ఎంతగా ఉందో తెలిస్తే?

ముందుగా బుక్ చేసుకున్న ప్రత్యేక దర్శనం టిక్కెట్లు పొందిన భక్తులతో పాటు కాలినడకన వచ్చే భక్తులు, ఎస్.ఎస్.డి టోకెన్లను తీసుకుని వచ్చే భక్తులు, శ్రీవాణి దర్శనం ద్వారా వచ్చే భక్తులు ఇలా తిరుమలలో రద్దీ కొనసాగుతుంది. తిరుమలలో వీధులన్నీ గోవింద నామస్మరణలతో మారుమోగిపోతున్నాయి. ఎక్కడ చూసినా భక్తులు కనిపిస్తున్నారు. బయట వరకూ క్యూ లైన్ విస్తరించి ఉండటంతో భక్తులు ఇబ్బందులు పడకుండా అవసరమైన అన్ని చర్యలు తిరుమల తిరుపతి దేవస్థానం అధికారులు చర్యలు తీసుకుంటున్నారు.

ఈరోజు తిరుమలలోని అన్ని కంపార్ట్ మెంట్లు భక్తులతో నిండిపోయాయి. బయట కృష్ణతేజ గెస్ట్ హౌస్ వరకూ భక్తుల క్యూ లైన్ విస్తరించింది. ఉచిత దర్శనం క్యూ లైన్ లోకి ఉదయం టోకెన్లు లేకుండా ప్రవేశించిన భక్తులకు శ్రీవారి దర్శనం పద్దెనిమిది గంటల సమయం పడుతుందని తిరుమల తిరుపతి దేవస్థానం అధికారులు తెలిపారు. టైమ్ స్లాట్ దర్శనం భక్తులకు ఆరు గంటలకుపైగానే సమయం పడుతుంది. మూడు వందల ప్రత్యేక దర్శనం టిక్కెట్లు కొనుగోలు చేసిన భక్తులకు శ్రీవారి దర్శనం మూడు నుంచి నాలుగు గంటల సమయం పడుతుంది. నిన్న తిరుమల శ్రీవారిని 87,536 మంది భక్తులు దర్శించకున్నారు. వీరిలో 35,120 మంది భక్తులు తమ తలనీలాలను సమర్పించి మొక్కులు చెల్లించుకున్నారు. నిన్న తిరుమల శ్రీవారి హుండీ ఆదాయం 3.33 కోట్ల రూపాయలు వచ్చిందని అధికారులు తెలిపారు.