Tirumala : తిరుమలలో నేటి భక్తుల రద్దీ ఎలా ఉందో తెలుసా?

పెళ్లిళ్ల సీజన్ కూడా కావడంతో పెళ్లిళ్లు పూర్తయిన వెంటనే వధూవరులతో పాటు కుటుంబ సభ్యులు ఏడు కొండల వాడిని దర్శించుకునేందుకు ఎక్కువగా తరలి వస్తున్నారు. వేసవి రద్దీ ఎక్కువగా ఉంటుందని ముందే ఊహించిన తిరుమల తిరుపతి దేవస్థానం అధికారులు సామాన్య భక్తులు ఇబ్బందులు పడకుండా సులువుగా దర్శనం అయ్యేలా చర్యలు తీసుకుంటున్నారు. దీంతో పాటు రోజు వారీ ఎస్.ఎస్.డి టోకెన్లు జారీ చేయడంతో పాటు కాలినడకన వచ్చే భక్తులు, ప్రత్యేక దర్శనం భక్తులు కూడా అధికంగా వస్తున్నారు.

ఈరోజు తిరుమలలోని వైకుంఠం క్యూ కాంప్లెక్స్ లోని అన్ని కంపార్ట్ మెంట్లు భక్తులతో నిండిపోయాయి. బయట ఏటీజీహెచ్ వరకూ భక్తులు క్యూ లైన్ లో విస్తరించి ఉన్నారు. ఉచిత దర్శనం క్యూ లైన్ లోకి ఉదయం ఏడున్నర గంటలకు టోకెన్లు లేకుండా ప్రవేశించిన భక్తులకు శ్రీవారి దర్శనం పద్దెనిమిది గంటల సమయం పడుతుందని తిరుమల తిరుపతి దేవస్థానం అధికారులు తెలిపారు. టైమ్ స్లాట్ దర్శనం భక్తులకు నాలుగు గంటలకు పైగానే సమయం పడుతుంది. మూడు వందల రూపాయల ప్రత్యేక దర్శనం టిక్కెట్లు కొనుగోలు చేసిన భక్తులకు శ్రీవారి దర్శనం మూడు నుంచి నాలుగు గంటల సమయం పడుతుంది. నిన్న తిరుమల శ్రీవారిని 76,000 మంది భక్తులు దర్శించుకున్నారు. వీరిలో 31,766 మంది తమ తలనీలాలను సమర్పించి మొక్కులు చెల్లించుకున్నారు. నిన్న తిరుమల శ్రీవారి హుండీ ఆదాయం 4.07 కోట్ల రూపాయలు వచ్చిందని అధికారులు తెలిపారు.