YSRCP : మ్యానిఫేస్టోలో మోదీ ఫొటో.. అడ్వర్‌టైజ్‌మెంట్ లో పవన్ ఫొటో మాయమయిందే

2019 లో పది లక్షల ఉద్యోగాలు ఇస్తామని చెప్పామని, ఏ ఒక్కరికీ ఉద్యోగం ఇవ్వలేదని, ఒక్క ఆయన కొడుకుకు మాత్రమే ఉద్యోగం ఇచ్చుకున్నాడని పేర్ని నాని ఎద్దేవా చేశారు. ఇప్పుడు ఇరవై లక్షల ఉద్యోగాలిస్తానని చెప్పడం విడ్డూరంగా ఉందన్నారు. చంద్రబాబు అలివి కాని వాగ్దానాలతో అమలు చేస్తామని చెబుతుంటే.. దానికి ఆయనకు మద్దతు పలికే మీడియా భజనలు చేస్తుందన్నారు. ప్రజలు వాటిని నమ్మి మరోసారి మోసపోవద్దని పేర్ని నాని పిలుపు నిచ్చారు. చంద్రబాబు ఇచ్చిన హామీలు అమలు చేయడం సాధ్యం కాదని అందరికీ తెలుసునని అన్నారు. ఈ వాగ్దానాలను అమలు చేయడానికి డబ్బులు ఎక్కడి నుంచి తెస్తారో చెప్పకుండా సంపద సృష్టిస్తానంటూ బిల్డప్పులు ఇస్తున్నారు తప్పించి అది అయ్యే పని కాదని నాని అన్నారు.