TDP : పరిటాల vs లోకేశ్.. సోషల్ మీడియాలో ఈ వార్ ఏంది గురూ?

తెలుగుదేశం పార్టీ నాయకత్వంపై పరిటాల వర్గీయులు భగ్గుమంటున్నారు. ఇటీవల నారా లోకేశ్ పరిటాల శ్రీరామ్ కు షోకాజ్ నోటీసులు ఇవ్వాలని చెప్పడంతో వారి నుంచి సోషల్ మీడియాలో పెద్దయెత్తున వ్యతిరేకంగా పోస్టులు కనపడుతున్నాయి. పరిటాల శ్రీరామ్ ధర్మవరం నియోజకవర్గం ఇన్ ఛార్జిగా వ్యవహరిస్తున్నారు. అయితే అక్కడ గ్రీవెన్స్ డే నిర్వహించకపోవడాన్ని నారా లోకేశ్ తప్పుపట్టారు. కేంద్ర పార్టీ కార్యాలయం ఇచ్చిన నివేదికను అనుసరించి లోకేశ్ గ్రీవెన్స్ డే ను నిర్వహించని వారందరికీ షోకాజ్ నోటీసులు ఇవ్వాలని తెలిపారు. అందులో కడప ఎమ్మెల్యే మాధవి, పులివెందుల టీడీపీ ఇన్ ఛార్జి బీటెక్ రవితో పాటు పరిటాల శ్రీరామ్ కూడా ఉన్నారు. వీరందరికీ నోటీసులు ఇవ్వాలని నారా లోకేశ్ పార్టీ కార్యాలయ సిబ్బందిని ఆదేశించారు.