TDP : లోకేశ్ కు సన్నిహితుడికే ఆ ఛాన్స్.. తేల్చేయనున్న అధిష్టానం

ఈ నేపథ్యంలో తంబళ్లపల్లె నియోజవర్గ టీడీపీ ఇన్ ఛార్జి విషయంలో టీడీపీ జాతీయ ప్రధాన కార్యదర్శి నారా లోకేశ్ జోక్యం చేసుకున్నట్లు తెలిసింది. పార్టీ ముఖ్యనేతలతో ఆయన మాట్లాడిన తర్వాత ఒక నిర్ణయానికి వచ్చినట్లు చెబుతున్నారు. పెద్దిరెడ్డి రామచంద్రారెడ్డి కుటుంబానికి ఎదురొడ్డి నిలిచే నేతను ఎంపిక చేసే అవకాశముందని అంటున్నారు. ఈ నేపథ్యంలోనే తెలుగుయువత రాష్ట్ర అధ్యక్షులు శ్రీరామ్ చినబాబు పేరు వినిపిస్తుంది. టీడీపీలోఉండి పెద్దిరెడ్డి ఫ్యామిలీ కోవర్టులుగా పని చేసే వారికి చెక్ పెట్టాలని మంత్రి లోకేష్ నిర్ణయం తీసుకున్నారు. శ్రీరామ్ చినబాబు బీసీ నాయకుడు కావడంతో ఆయన పేరు ఖరారు చేసే అవకాశముందని అంటున్నారు. వచ్చే ఏడాది ఆరంభంలో జరగనున్న స్థానిక సంస్థల ఎన్నికలకు పార్టీ క్యాడర్ ను సమాయత్తం చేయాలంటే సమర్థుడైన, నమ్మకమైన నేతను తంబళ్లపల్లె టీడీపీ ఇన్ ఛార్జిగా ఎంపిక చేయాలని నిర్ణయించినట్లు సమాచారం.

తెలుగు యువత రాష్ట్ర అధ్యక్షుడు శ్రీరామ్ చినబాబుతో పాటు మాజీ ఎమ్మెల్యే శంకర్ యాదవ్ పేరును కూడా నాయకత్వం పరిశీలనలో ఉన్నట్లు చెబుతున్నారు. ఈ ఇద్దరిలో యువకుడు, అందరికీ సుపరిచితుడైన శ్రీరామ్ చినబాబు పేరు తంబళ్లపల్లె నియోజకవర్గ ఇన్ ఛార్జిగా త్వరలోనే ప్రకటించే ఛాన్స్ ఉందని అంటున్నారు. శ్రీరామ్ చినబాబు గత ఎన్నికల్లో మదనపల్లె శాసనసభ టిక్కెట్ ఆశించి విఫలమయ్యారు. అక్కడ మైనారిటీ కోటాలో షాజ్ హాన్ భాషాకు ఇవ్వడంతో ఆయన గెలుపు కోసం చినబాబు పనిచేశారు. టిక్కెట్ దక్కకపోయినా పార్టీ కోసం నిబద్దతతో పనిచేసిన శ్రీరామ్ చినబాబుకు అవకాశం ఇవ్వాలన్నది లోకేశ్ అభిప్రాయంగా ఉంది. పార్టీ అధినేత చంద్రబాబు నాయుడు ఈ విషయంలో విభేదించకపోవచ్చంటున్నారు. రేపో, మాపో అధికారిక ప్రకటన వెలువడే అవకాశముందని పార్టీ వర్గాల ద్వారా అందుతున్నసమాచారాన్ని బట్టి తెలుస్తోంది.