Weather Report : బలపడిన అల్పపీడనం...రెండు తెలుగు రాష్ట్రాలకు అలెర్ట్

ఆంధ్రప్రదేశ్ లో ఏర్పడిన అల్పపీడన ప్రభావం మరింత బలపడటంతో భారీ నుంచి అతి భారీ వర్షాలు పడతాయని విశాఖ వాతావరణ శాఖ తెలిపింది. రాష్ట్ర వ్యాప్తంగా వర్షాలు విస్తారంగా కురుస్తాయని చెప్పడమే కాకుండా ఎల్లో అలెర్ట్ ను జారీ చేసింది. ఉత్తరకోస్తాలో అతి భారీ వర్షాలు పడతాయని తెలిపింది. బలపడిన అల్పపీడనం రానున్న నలభై ఎనిమిది గంటల్లో ఒడిశా వద్ద తీరం దాటే అవకాశం ఉందని పేర్కొంది. శ్రీకాకుళం, విజయనగరం, విశాఖపట్నం, తూర్పు గోదావరి, పశ్చిమ గోదావరి జిల్లాల్లో భారీ నుంచి అతి భారీ వర్షాలు పడతాయని, అలాగే కృష్ణా, గుంటూరు జిల్లాల్లో తేలిక పాటి నుంచి మోస్తరు వర్షాలు పడతాయని విశాఖ వాతావరణ శాఖ తెలిపింది.

తెలంగాణాలోనూ మూడు రోజుల పాటు భారీ వర్షాలు పడనున్నాయని హైదరాబాద్ వాతావరణ శాఖ తెలిపింది. ఈరోజు ఉరుములు, మెరుపులతో కూడిన భారీ వర్షాలు పడతాయని వాతావరణ కేంద్రం తెలిపింది రాజన్న సిరిసిల్ల, పెద్దపల్లి, నిజామాబాద్, నిర్మల్, ములుగు, మంచిర్యాల, మహబూబాబాద్, కొమ్రంభీం ఆసిఫాబాద్, కరీంనగర్, జయశంకర్ భూపాలపల్లి, జగిత్యాల, భద్రాద్రి కొత్త గూడెం, ఆదిలాబాద్ జిల్లాల్లో భారీ నుంచి అతి భారీ వర్షాలు పడతాయని వాతావరణ శాఖ అలెర్ట్ జారీ చేసింది. గంటకు నలభై నుంచి యాభై కిలోమీటర్ల వేగంతో ఈదురుగాలులు వీస్తాయని, కొన్ని జిల్లాల్లో మోస్తరు వర్షాలు పడతాయని వాతావరణ శాఖ పేర్కొంది. ప్రజలు అప్రమత్తంగా ఉండాలని హెచ్చరించింది.