Rain Alert : పొంచి ఉన్న వాయుగండం ముప్పు.. వాన దెబ్బకు వామ్మో అనాల్సిందే

ఆంధ్రప్రదేశ్ లో వారం రోజుల పాటు వాయుగుండం ప్రభావం ఉంటుందని విశాఖ వాతావరణ కేంద్రం తెలిపింది. ఈ నెల 26వ తేదీ నుంచి 29వ తేదీ వరకూ భారీ నుంచి అతి భారీ వర్షాలు పడతాయని వాతావరణ శాఖ చెప్పింది. అలాగే తీరంవెంట బలమైన ఈదురుగాలులు కూడా వీస్తాయని పేర్కొంది. గంటకు యాభై నుంచి అరవై కిలోమీటర్ల వేగంతో ఈదురుగాలులు వీస్తాయని చెప్పింది. ఈరోజు కోస్తాంధ్రలో కొన్ని చోట్ల భారీ వర్షాల నుంచి అతి భారీ వర్షాలు పడతాయని తెలిపింది. అలాగే ఈ నెల 26వ తేదీన పల్నాడు, గుంటూరు, పశ్చిమ గోదావరి, ఏలూరు జిల్లాల్లో మోస్తరు నుంచి భారీ వర్షాలు పడతాయని వాతావరణ శాఖ తెలిపింది. ప్రమాదకరంగా వాగులు, నదులు ప్రవహిస్తున్నాయని ఎవరూ దాటే ప్రయత్నం చేయవద్దని తెలిపింది.

తెలంగాణలో మరో వారం రోజుల పాటు భారీ నుంచి అతి భారీ వర్షాలు పడతాయని హైదరాబాద్ వాతావరణ శాఖ వెల్లడించింది. ఈ నెల 26, 27 తేదీల్లో భారీ నుంచి అతి భారీ వర్షాలు పడతాయని, తెలంగాణలోని పద్దెనమిది జిల్లాలకు భారీ వర్ష సూచనను హైదరాబాద్ వాతావరణ శాఖ తెలిపింది. దాదాపు కొన్ని చోట్ల ఇరవై సెంటీమీటర్ల వర్షపాతం నమోదయ్యే అవకాశముందని, లోతట్టు ప్రాంతాల ప్రజలు అప్రమత్తంగా ఉండాలని హెచ్చరించింది. జోగులాంబ గద్వాల్, వనపర్తి, నాగర్ కర్నూల్, మహబూబ్ నగర్, సంగారెడ్డి, వికారాబాద్ జిల్లాల్లో నేడు భారీ వర్షాలు కురుస్తాయని, ఇరవై ఒక్క జిల్లాలకు ఎల్లో అలెర్ట్ ను వాతావరణ శాఖ జారీ చేసింది. ప్రజలు అప్రమత్తంగా ఉండాలని హెచ్చరించింది.