Rain Alert : మూడు రోజుల పాటు ఏపీలో వర్షాలే.. భయపెడుతున్నారుగా

దీంతో పాటు ఈదురుగాలులు కూడా వీచే అవకాశముందని తెలిపింది. కొన్నిచోట్ల పిడుగులు పడే అవకాశముందని పశువుల కాపర్లు జాగ్రత్తలు పాటించాలని అధికారులు హెచ్చరికలు జారీ చేశారు. గంటకు నలభై నుంచి యాభై కిలోమీటర్ల వేగంతో ఈదురుగాలులు వీచే అవకాశముందని కూడా వాతావరణ శాఖ అధికారులు తెలిపారు. అయితే మత్స్యకారులకు మాత్రం ఎలాంటి హెచ్చరికలు వాతావరణ శాఖ కానీ, ప్రభుత్వం నుంచి కానీ హెచ్చరికలు జారీ కాలేదు. పండగను వర్షం దెబ్బతీస్తుందేమోనన్న ఆందోళన జనాల్లో నెలకొంది.

పొడి వాతావరణంతో చలిగాలుల తీవ్రత కూడా పెరిగే అవకాశముందని వాతావరణ శాఖ తెలిపింది. చలి నుంచి కాపాడుకోవడానికి తగిన జాగ్రత్తలు పాటించాలని కూడా సూచించింది. ఆంధ్రప్రదేశ్ తో పాటు కేరళ, తమిళనాడు తీరాలకు కల్లక్కడల్ ముప్పు పొంచి ఉందని కేంద్రం ముందస్తు హెచ్చరిక జారీ చేసింది. జనవరి 15 న రాత్రి అకస్మాత్తుగా సముద్రంలో వచ్చే ఉప్పెన కారణంగా బలమైన అలలు ఎగసిపడే అవకాశం ఉందని సమాచారం. రాత్రి 11.30 గంటల వరకు తీరంలోని వివిధ ప్రాంతాల్లో 0.5 మీ. నుంచి 1 మీటర్ల మేర అలల తాకిడి ఉంటుందని, సముద్ర ఉప్పెన ముప్పు పొంచి ఉందని ఇండియన్ నేషనల్ సెంటర్ ఫర్ ఓసియన్ ఇన్ఫర్మేషన్ సర్వీసెస్ హెచ్చరించింది. కేరళ, తమిళనాడుల్లో మత్స్యకారులను చేపలవేటకు వెళ్లవద్దని హెచ్చరికలు జారీ చేశారు. సముద్రం అల్లకల్లోలంగా మారే అవకాశముందని తెలిపారు.