Weather Report : నేటి నుంచి ఏపీలో మూడు రోజులు భారీ వర్షాలు

ఈరోజు కొన్ని జిల్లాల్లో వర్షాలు పడే అవకాశముందని వాతావరణ శాఖ అంచనాగా ఉంది. అల్లూరి సీతారామరాజు, కాకినాడ, కోనసీమ, పశ్చిమ గోదావరి, కృష్ణా, నెల్లూరు, కర్నూలు, ప్రకాశం, నంద్యాల, అనంతపురం, సత్యసాయి, కడప జిల్లాల్లో వర్షాలు పడతాయని తెలిపింది. రేపు ప్రకాశం, నెల్లూరు, తిరుపతి, అన్నమయ్య, చిత్తూరు జిల్లాల్లో వర్షాలు పడతాయని పేర్కొంది. ఎల్లుండి తిరుపతి, అన్నమయ్య, చిత్తూరు, నెల్లూరు, కడప, సత్యసాయి జిల్లాల్లో వర్షాలు కురిసే ఛాన్స్ ఉందని వాతావరణ శాఖ అధికారులు పేర్కొన్నారు. అందుకే ఈరోజు నుంచి ఏపీలో అనేక చోట్ల భారీ వర్షాలతో పాటు కొన్ని చోట్ల మోస్తరు వర్షాలు కురుస్తాయని వాతావరణ శాఖ తెలిపింది.

రైతులు ప్రధానంగా తమ పంటలను జాగ్రత్తగా కాపాడుకోవాలని సూచించింది. వర్షానికి ధాన్యం తడవకుండా తగిన జాగ్రత్తలు ముందుగానే తీసుకుంటే మంచిదని సూచించింది. ప్రజలు కూడా అప్రమత్తంగా ఉండాలని పేర్కొంది. తీర ప్రాంత ప్రజలు కూడా అలెర్ట్ గా ఉండాలని తెలిపింది. అలాగే ఈదురుగాలులు కూడా వీస్తాయని, ముప్ఫయి నుంచి నలభై కిలోమీటర్ల వేగంతో బలమైన గాలులు వీచే అవకాశముందని వాతావరణ శాఖ తెలిపింది. అల్పపీడనం ప్రస్తుతం స్థిరంగా కొనసాగుతున్నా అది వాయుగుండంగా మారే అవకాశం లేకపోలేదని వాతావరణ శాఖ తెలిపింది. ఈ వాయుగుండం ఈ నెల 11న శ్రీలంక - తమిళనాడుల మధ్య తీరాన్ని తాకవచ్చని పేర్కొంది.