Rain Alert : ఫ్లాష్ ఫ్లడ్స్ ముప్పు ఈ జిల్లాలకు.. అలెర్ట్ గా ఉండాల్సిందే

పునరావాస కేంద్రాలకు తరలించేందుకు అవసరమైన పడవలతో పాటు ఎన్డీఆర్ఎఫ్, ఎస్డీఆర్ఎఫ్ సిబ్బందిని కూడా సిద్ధం చేసుకుని ఉండాలని, అవసరమైన ప్రాంతానికి తరలించేలా ముందస్తు ఏర్పాట్లు చేసుకుంటే మంచిదని వాతావరణ శాఖ సూచించింది. ఆంధ్రప్రదేశ్ లో ఫ్లాష్ ఫ్లడ్స్ సంభవించే జిల్లాలను కూడా గుర్తించి ఆయా జిల్లా కలెక్టర్లను అప్రమత్తం చేయాలని ప్రభుత్వానికి విశాఖ వాతావరణ కేంద్రం తెలిపింది. ముఖ్యంగా ప్రకాశం, పల్నాడు, నంద్యాల జిల్లాలకు ఫ్లాష్ ఫ్లడ్స్ ముప్పు పొంచి ఉందని తెలిపింది. ఈ జిల్లాలకు చెందిన ప్రజలు అప్రమత్తంగా ఉండాలని, రానున్న ఇరవై నాలుగు గంటలు బయటకు వెళ్లకుండా ఉంటేనే మంచిదని చెప్పింది. ఇక ఏలూరు, ఎన్టీఆర్ జిల్లాలకు ఆరెంజ్ అలెర్గ్ జారీ చేసింది. భారీ నుంచి అతి భారీ వర్షాలు కురుస్తాయని తెలిపింది. శ్రీకాకుళం, విజయనగరం, పార్వతీపురం, అల్లూరి జిల్లాలకు ఎల్లో అలెర్ట్ జారీ చేసింది.

తెలంగాణాలోనూ రానున్న ఇరవై నాలుగు గంటల్లో భారీ నుంచి అతి భారీ వర్షాలు కురుస్తాయని భారత వాతావరణ శాఖ పేర్కొంది. అల్పపీడనం మరింత బలపడే అవకాశమున్నందున రాగల రెండు రోజుల పాటు తెలంగాణలో భారీ వర్ష హెచ్చరికలను హైదరబాద్ వాతావరణ కేంద్రం జారీ చేసింది. ఈరోజు హైదరాబాద్ నగరంలో భారీ వర్షం కురిసే ఛాన్స్ ఉందని కూడా తెలిపింది. ఇప్పటికే హైదరాబాద్ వాతావరణ కేంద్రం ఎనిమిది జిల్లాలకు ఎల్లో అలెర్ట్ ను జారీ చేయగా, పన్నెండు జిల్లాలకు ఆరెంజ్ అలెర్ట్ జారీ చేసింది. తెలంగాణ ప్రభుత్వం ఇప్పటికే ఉద్యోగులకు సెలవులను రద్దు చేసింది. ప్రాజెక్టులు కూడా నిండుకుండలా మారడంతో లోతట్టు ప్రాంతాల ప్రజలను అప్రమత్తం చేయాలని ప్రభుత్వం జిల్లా కలెక్టర్లను ఆదేశించింది. వాగులు, వంకలు పొంగిపొరలు తున్నాయి. ఎవరూ నదులు, వాగులు, వంకలు దాటే ప్రయత్నం చేసి ప్రాణాలపైకి తెచ్చుకోవద్దని కూడా హెచ్చరికలు జారీ చేసింది.