TDP : మాచర్లలో టీడీపీ రెండుగా చీలనుందా?

నూతన సంవత్సర వేడుకల నుంచి మాచర్లలోని రెండు వర్గాల మధ్య వివాదం మరింత ముదిరింది. టీడీపీ కార్యకర్తలపై జూలకంటి కన్నెర్ర చేశారంటూ సోషల్ మీడియాలో పెద్ద యెత్తున పోస్టులు కనిపిస్తున్నాయి. మాచర్ల లో టీడీపీ రెండుగా చీలబోతుందన్న అనుమానాలు వ్యక్తమవుతున్నాయి. ఇప్పటికే బ్రహ్మారెడ్డి పై గుర్రుగా ఉన్న ఒక ప్రధాన సామాజికవర్గం నాయకులు, స్థానిక నెహ్రూనగర్ లోని వీవీఎన్ గార్డెన్స్ లో నిర్వహించిన నూతన సంవత్సర వేడుకలకు డుమ్మా కొట్టారు. అంతే కాదు దానికి కూత వేటు దూరంలో అదే నెహ్రూనగర్ లో పల్నాడు అర్బన్ డెవలెప్ మెంట్ అథారిటీ చైర్మన్ , మాచర్ల తెలుగుదేశం సీనియర్ నాయకులు చిరుమామిళ్ల మధుబాబు నివాసం వద్ద ఏర్పాటు చేసిన వేడుకల్లో వారు పాల్గొనడం రాజకీయంగా చర్చనీయాంశంగా మారింది.

వచ్చే ఎన్నికల్లో జూలకంటి బ్రహ్మారెడ్డి కి టిక్కెట్ ఇవ్వొద్దని, ఇస్తే ఓడిపోతామని, మధు బాబు కి తమ మద్దతు అని రెండు మండలాలకు చెందిన నాయకులు అధిష్టానానికి సంకేతాలు పంపారు. ఇప్పటికే పలుమార్లు టీడీపీ అధినేత చంద్రబాబు, యువనేత లోకేష్ వద్దకు వెళ్లి మధుబాబు కి రెండు మండలాలు అప్పచెప్పాల్సిందిగా విజ్ఞప్తి చేసిన ఆ నాయకులు ఇప్పుడు అసలు బ్రహ్మారెడ్డి వంక కూడా చూడట్లేదట. ఇదంతా ఇప్పుడే మొదలుపెట్టొదు, దానికి ఇంకా సమయం ఉంది అని వారితో వారించిన మధుబాబు, నామ మాత్రంగా నిన్న బ్రహ్మారెడ్డి ని కలిసి నూతన సంవత్సర శుభాకాంక్షలు తెలిపారంటున్నారు. అయితే నూతన సంవత్సరం వేడుకల సందర్భంగా మధుబాబు నివాసానికి వెళ్లిన నాయకుల పేర్లు మొత్తం కనుక్కుని తనకి అందజేయాలని తన అత్యంత సన్నిహితుడైన రేషన్ వ్యాపారి కి ఎమ్మెల్యే జూలకంటి బ్రహ్మారెడ్డి చెప్పారని సమాచారం. దీంతో మాచర్లలో టీడీపీ రెండు వర్గాలుగా విడిపోయిందంటున్నారు.