Chandrababu : టమోటాకు.. పొటాటోకు తేడా తెలియని అసమర్థుడి పాలనలో ఉన్నాం

ఈ రాక్షస పాలనకు చరమగీతం పాడాలని ఆయన పిలుపు నిచ్చారు. వ్యవసాయ శాఖనే మూసివేశారన్నారు. టమోటాకు, పొటాటోకు తేడా తెలియని ముఖ్యమంత్రి అని ఎద్దేవా చేశారు. రాజధాని అమరావతికి దుస్థితి రావడానికి కారకులు ఎవరు అని సభకు వచ్చిన ప్రజలను చంద్రబాబు ప్రశ్నించారు. తెలుగు జాతి గ్లోబల్ గా ఎదిగేందుకు టీడీపీ ఉపయోగపడిందని ఆయన తెలిపారు. జగన్ రెడ్డిది అంతా రివర్స్ పాలన అని ఆయన ఫైర్ అయ్యారు. పోలవరం ప్రాజెక్టు పూర్తి చేయలేకపోయిన అసమర్థ ముఖ్యమంత్రి అని జగన్ పై చంద్రబాబు మండిపడ్డారు. చివరకు కాంట్రాక్టర్లు ఆత్మహత్యలు చేసుకునే పరిస్థితి ఏర్పడింది. చింతలపూడి ఎత్తిపోతల పథకాన్ని పూర్తి చేస్తే 32 మండాలలకు నీళ్లు వచ్చేవని, కానీ అది పూర్తి చేయలేకపోయారని ఆయన అన్నారు. తిరువూరు, నందిగామ, మైలవరం, జగ్గయ్యపేట, నూజివీడు ప్రాంతాలకు నీళ్లు వచ్చే పథకాన్ని ఎండబెట్టారని అన్నారు. ఈ ప్రాజెక్టును పూర్తి చేసే బాధ్యతను తాను తీసుకుంటానని చెప్పారు.

రైతులు బాగుపడాలంటే టీడీపీ, జనసేన ప్రభుత్వం రావాలని, ఈ సైతాన్ సర్కార్ పోవాలని ఆయన అన్నారు. మూడు రాజధానులను మూడు ముక్కలు చేసి సర్వనాశనం చేశారన్నారు. ఆరోజు సైబరాబాద్ తాను చేయకుంటే ఇప్పుడు హైదరాబాద్ అలా అభివృద్ధి అయ్యేదా? అని ప్రశ్నించారు. మనకు రాజధాని లేకుండా ఐదేళ్ల పాలించాడని అన్నారు. తాము అధికారంలోకి రాగానే దేవతల రాజధానిగా అమరావతిని తీర్చిదిద్దుతామని చంద్రబాబు తెలిపారు. యువతకు ఉపాధి లేకుండా పోయిందన్నారు. మహిళలు అన్ని రకాలుగా ఇబ్బందులు పడుతున్నారని అన్నారు. నిత్యావసర వస్తువల ధరలు పెరిగిపోయాయని చెప్పారు. విద్యుత్తు ఛార్జీలను తొమ్మిది సార్లు పెంచి జనాన్ని బాదుతున్నారన్నారు. చివరకు చెత్తపై కూడా పన్ను వేసే హీన స్థితికి ఈ ప్రభుత్వం దిగజారిందని చంద్రబాబు మండిపడ్డారు.