ఒంగోలు బస్టాండ్ ఆర్టీసీ బస్సునే ఎత్తుకెళ్లాడు

ప్రకాశం జిల్లా ఒంగోలులో బస్టాండ్‌లో ఖాళీగా ఉన్న ఆర్టీసీ బస్సును అపహరించాడో వ్యక్తి. సమాచారం అందుకున్న పోలీసులు కొద్ది దూరంలోనే బస్సును అడ్డుకొని నిందితుడిని అదుపులోకి తీసుకున్నారు. కర్నూల్‌-1 డిపోకు చెందిన బస్సును ఒంగోలు బస్టాండ్‌లో పార్కు చేసిన డ్రైవర్‌ తాళాలను బస్సుకే ఉంచి విశ్రాంతి తీసుకునేందుకు విశ్రాంతి గదికి వెళ్లాడు. అదే సమయంలో అక్కడికి వచ్చిన ఓ వ్యక్తి ఆ బస్సు ఎక్కి డ్రైవింగ్‌ చేసుకుంటూ తీసుకెళ్లాడు. బస్టాండ్‌లో ఉన్న కొందరు ప్రయాణికులు వెంటనే ఈ విషయాన్ని డిపోలోని ఔట్‌పోస్టు పోలీసులకు తెలిపారు. ఒంగోలులోని కర్నూల్‌రోడ్డు ఫ్లైవోవర్‌ వద్ద బస్సును పోలీసులు అడ్డుకొని నిందితుడిని అదుపులోకి తీసుకున్నారు. బస్సును ఆర్టీసీ బస్టాండ్‌కు, నిందితుడిని ఒంగోలు వన్‌టౌన్‌ పోలీసుస్టేషన్‌కు తరలించారు.