TDP : గొట్టిపాటి లక్ష్మికి.. శిద్ధా ఇలా చెక్ పెడుతున్నారా?

ప్రధానంగా అధికారులు తమను కొన్ని ప్రభుత్వ కార్యక్రమాలకు కూడా ఆహ్వానించడం లేదని వైసీపీ ఎమ్మెల్యేలు చెబుతున్నారు. కానీ టీడీపీ ఇన్ ఛార్జులు మాత్రం వచ్చే ఎన్నికల్లో గెలుపు కోసం ఫలితాలు వెలువడిన మరుసటి రోజు నుంచి ప్రజల్లో ఉండి పనిచేస్తున్నారు. దర్శి నియోజకవర్గంలో పోటీ చేసి ఓటమి పాలయిన గొట్టిపాటి లక్ష్మి నియోజకవర్గంలోనే ఉంటూ పార్టీ క్యాడర్ కు అందుబాటులో ఉంటున్నారు. 2014–19 మధ్య దర్శి నియోజకవర్గంలో అభివృద్ధిని నాడు మాజీ మంత్రి శిద్ధారాఘవరావు చేపట్టినా నేడు కూడా గొట్టిపాటి లక్ష్మి నియోజకవర్గాన్ని తన ఇన్ ఛార్జి పదవితోనే అభివృద్ధి పనులు చేస్తూ ప్రజల్లో నిత్యం తిరుగుతున్నారు. అయితే తాజా పరిణామాలు గొట్టిపాటి లక్ష్మి వర్గానికి మింగుడు పడటం లేదు.

గొట్టిపాటి లక్ష్మీ ఎన్నికలకు కేవలం 30 రోజులు ముందే వచ్చి ధైర్యంగా దర్శి నియోజకవర్గంలో పోటీ చేశారు. ప్రస్తుతం ఇన్‌చార్జ్ హోదాలో ఉన్న గొట్టిపాటి లక్ష్మి, తాను చేయగలిగినంత మేరకు దర్శి నియోజకవర్గ అభివృద్ధి కోసం నిధులు రాబడుతున్నారు. దర్శి లో శివాజీ నగర్‌లో క్రికెట్ స్టేడియం, దర్శి టౌన్‌లో డ్రైనేజ్ నిర్మాణానికి 1.5 కోట్లు మంజూరు చేయించారంటున్నారు. అన్నా కాంటీన్, టీటీడీ కళ్యాణ మండపం తీసుకు వచ్చారంటున్నారు. అయితే గత కొన్నాళ్లుగా టీడీపీలో మాజీ మంత్రి శిద్ధా రాఘవరావు తిరిగి వస్తున్నారని టీడీపీలోని కొందరు ప్రచారం చేస్తుండటాన్ని తప్పుపడుతూ సోషల్ మీడియాలో పోస్టులు పెడుతున్నారు. శిద్ధా రాఘవరావు ఐదు సంవత్సరాలు మంత్రిగా పనిచేసిన తర్వాత, తదుపరి ఎన్నికల్లో దర్శి నియోజకవర్గంలో చరిత్రలో లేనంత భారీ మెజారిటీతో వైసీపీ గెలిచిన సంగతి మర్చిపోవద్దంటూ టీడీపీ నేతలే హెచ్చరిస్తున్నారు.