Cyclone Alert : తుపాను తీరం దాటే సమయంలో ఇలా వ్యవహరించాల్సిందేనట

ఆంధ్రప్రదేశ్ లో తుపాను ప్రభావంతో శని, ఆదివారాల్లో భారీ నుంచి అతి భారీ వర్షాలు పడే అవకాశముందని విశాఖ వాతావరణ శాఖ తెలిపింది. మత్స్యకారులు చేపల వేటకు వెళ్లవద్దని సూచించింది. ప్రజలు అప్రమత్తంగా ఉండాలని హెచ్చరించింది. రైతులు తమ పంట ఉత్పత్తులను రక్షించుకునేందుకు తగిన జాగ్రత్తలు తీసుకోవాలని కోరింది. ప్రధానంగా వరి వంటి పంటలను కోత కోసి సురక్షిత ప్రాంతాలకు తరలించుకోవడం మంచిదని సూచించింది. తిరుపతి, చిత్తూరు, నెల్లూరు, ప్రకాశం, అన్నమయ్య జిల్లాల్లో భారీ వర్షాలు పడే అవకాశముందని తెలిపింది. కోస్తాంధ్ర, ఉత్తరాంధ్రలోనూ మోస్తరు నుంచి భారీ వర్షాలు పడతాయని, మిగిలిన చోట్ల మోస్తరు నుంచి తేలికపాటి జల్లులు పడతాయని పేర్కొంది.

తుపాను ప్రభావంతో తెలంగాణలోనూ కొన్ని ప్రాంతాల్లో తేలికపాటి నుంచి మోస్తరు వానలు పడతాయని హైదరాబాద్ వాతావరణ శాఖ తెలిపింది. ప్రధానంగా దక్షిణ తెలంగాణలోని జిల్లాల్లో మోస్తరు వానలు పడతాయని చెప్పింది. అయితే ఈరోజు మాత్రం తెలంగాణలో పొడి వాతావరణం ఉంటుందని హైదరాబాద్ వాతావరణ శాఖ వెల్లడించింది. అయితే ప్రస్తుతం తెలంగాణలో చలితీవ్రత కొంత తగ్గింది. సింగిల్ డిజిట్ ఉష్ణోగ్రతలు నమోదు కావడం లేదు. ఏజెన్సీ ఏరియాలో తప్పించి మిగిలిన ప్రాంతాల్లో చలిగాలుల తీవ్రత పెద్దగా లేదు. అయితే రానున్న కాలంలో చలితీవ్రత పెరిగే అవకాశముందని కూడా వాతావరణ శాఖ అధికారులు తెలిపారు. మరొకవైపు ఉదయం వేళ పొగమంచు మాత్రం దట్టంగా అలుముకుంటుండటంతో వాహనదారులు, మార్నింగ్ వాకర్స్ ఇబ్బందులు పడుతున్నారు.