Tirumala : తిరుమలలో మంగళవారం భక్తులు వెయిటింగ్ టైం ఎంతంటే?

ముందుగా ప్రత్యేక దర్శనం టిక్కెట్లు బుక్ చేసుకున్న వారు మాత్రమే తిరుమలకు వస్తున్నారు. మరొకవైపు ఎండల తీవ్రత కూడా ఎక్కువగా ఉంది. దీంతో తిరుమలకు వచ్చేందుకు భక్తులు జంకుతున్నారు. ఇక ఏప్రిల్, మే నెలలో పరీక్షా ఫలితాలు వస్తాయి కాబట్టి మొక్కులు చెల్లించుకోవడానికి అత్యధిక సంఖ్యలో తిరుమలకు భక్తులు చేరుకుంటారని తిరుమల తిరుపతి దేవస్థానం అధికారులు అభిప్రాయపడుతున్నారు. ప్రస్తుతం లడ్డూ కౌంటర్లు, అన్న ప్రసాదం కేంద్రం వద్ద కూడా భక్తుల రద్దీ స్వల్పంగానే ఉంది.

ఈరోజు తిరుమలలోని వైకుంఠం క్యూ కాంప్లెక్స్ లోని ఆరు కంపార్ట్ మెంట్లలో భక్తులు శ్రీవారి దర్శనం కోసం వేచి ఉన్నారు. ఉచిత దర్శనం క్యూ లైన్ లో ఉదయం ఏడు గంటలకు టోకెన్లు లేకుండా ప్రవేశించిన భక్తులకు శ్రీవారి దర్శనం పన్నెండు గంటల సమయం పడుతుందని తిరుమల తిరుపతి దేవస్థానం అధికారులు తెలిపారు. టైమ్ స్లాట్ దర్శనం భక్తులకు నాలుగు గంటల సమయం పడుతుంది. మూడు వందల రూపాయల ప్రత్యేక దర్శనం టిక్కెట్లు కొనుగోలు చేసిన భక్తులకు శ్రీవారి దర్శనం రెండు నుంచి మూడు గంటల సమయం పడుతుంది. నిన్న తిరుమల శ్రీవారిని 65,683 మంది భక్తులు దర్శించుకున్నారు. వీరిలో 23,453 మంది భక్తులు తలనీలాలను సమర్పించుకున్నారు. నిన్న తిరుమల శ్రీవారి హుండీ ఆదాయం 3.74 కోట్ల రూపాయలు వచ్చింది.