Tirumala : తిరుమలలో తగ్గిన భక్తుల రద్దీ రీజన్ ఇదేనట

తాజాగా తిరుమల తిరుపతి దేవస్థానం అధికారులు మరో కీలక నిర్ణయం తీసుకున్నారు. సిఫార్సు లేఖలను కూడా ఇకపై తీసుకోవాలని నిర్ణయించారు. ఈనెల 15వ తేదీ నుంచి సిఫార్సు లేఖలను అనుమతించడానికి తిరుమల తిరుపతి దేవస్థానం అధికారులు నిర్ణయించారు. వేసవిలో రద్దీ ఎక్కువగా ఉంటుందని భావించి మే 1వ తేదీ నుంచి జులై 15వ తేదీ వరకూ ఎలాంటి సిఫార్సు లేఖలను స్వీకరించబోమని గతంలో టీటీడీ నిర్ణయం తీసుకుంది. అయితే భక్తుల రద్దీ అంతగా లేకపోవడంతో నిర్ణయాన్ని పునస్సమీక్షించి రేపటి నుంచి సిఫార్సు లేఖలను అనుమతించనున్నట్లు టీటీడీ తెలిపింది.

ఈరోజు తిరుమలలోని వైకుంఠం క్యూ కాంప్లెక్స్ లోని తొమ్మిది కంపార్ట్ మెంట్లలో శ్రీవారి దర్శనం కోసం భక్తులు వేచి ఉన్నారు. ఉచిత దర్శనం క్యూ లైన్ లో వేచి ఉన్న భక్తులకు శ్రీవారి దర్శనం మూడు గంటల సమయం పడుతుందని తిరుమల తిరుపతి దేవస్థానం అధికారులు తెలిపారు. టైమ్ స్లాట్ దర్శనం భక్తులకు శ్రీవారి దర్శనం రెండు గంటల సమయం పడుతుంది. మూడు వందల రూపాయల ప్రత్యేక దర్శనం టిక్కెట్లు కొనుగోలు చేసిన భక్తులకు శ్రీవారి దర్శనం రెండు నుంచి మూడు గంటల సమయం పడుతుందని అధికారులు తెలిపారు. నిన్న తిరుమల శ్రీవారిని 74,477 మంది భక్తులు దర్శించుకున్నారు. వీరిలో 28,294 మంది భక్తులు తమ తలనీలాలను సమర్పించి మొక్కులు చెల్లించుకున్నారు. నిన్న తిరుమల శ్రీవారి హుండీ ఆదాయం 2.84 కోట్ల రూపాయల ఆదాయం వచ్చిందని అధికారులు తెలిపారు.