Chandrababu : చంద్రబాబును తక్కువగా అంచనా వేస్తే ఇక అంతే?

వైఎస్ జగన్ కు పూర్తి భిన్నంగా ఆయన వ్యవహరిస్తున్నారు. జనంలోకి నేరుగా వెళుతున్నారు. పేదలతో మమేకం అవుతున్నారు. వారి ఇళ్లలోకి వెళ్లి మరీ సమస్యలను అడిగి తెలుసుకుంటున్నారు. చంద్రబాబు గతంలో ఎప్పుడూ ఇలా చేయలేదు. తాను ముఖ్యమంత్రిగా, రాష్ట్రానికి ముఖ్య కార్యనిర్వహణ అధికారిగా మాత్రమే వ్యవహరించే వారు. కానీ 2024 ఎన్నికల్లో గెలిచిన తర్వాత మాత్రం చంద్రబాబు పూర్తిగా మారిపోయారు. ఎంతగా అంటే జిల్లా పర్యటనలకు వెళితే ఖచ్చితంగా సామాన్యులతో కొంత సేపు గడుపుతున్నారు. వారి వెంట నడుస్తున్నారు. కెమెరాల కోసమేనని కొందరు విమర్శలు చేస్తున్నా గతంలో ఇటువంటి చంద్రబాబును రాష్ట్ర ప్రజలు చూడలేదన్నది మాట మాత్రం వాస్తవం.

ఇక జగన్ ను కూడా తక్కువగా అంచనా వేయడానికి వీలులేదు. ఎందుకంటే మొన్నటి ఎన్నికల్లోనే నలభై శాతం ఓట్లు వైసీపీకి వచ్చాయి. తాము ముగ్గురం కలసినా అరవై శాతం ఓట్లు వచ్చాయి. అంటే జగన్ ను తక్కువగా అంచనా వేయడానికి వీలులేదు. జగన్ పార్టీని ఒకవైపు బలహీనం చేస్తూనే మరొకవైపు టీడీపీ ని మరింత బలోపేతం చేసే దిశగా కార్యాచరణ సిద్ధం చేస్తున్నారు. ఏడాది పాలన పూర్తయిన తర్వాత సుపరిపాలన తొలి అడుగు పేరిట జనంలోకి ఎమ్మెల్యేలను పంపడంతో పాటు ఇక తరచూ ఇలాంటి కార్యక్రమాలను రూపొందించి నిరంతరం ఎమ్మెల్యేలను యాక్టివ్ గా ఉంచడం కారణంగా వారితో పాటు పార్టీకి కూడా ఉపయోగకరంగా ఉంటుందని నమ్ముతున్నారు.

ఇక చంద్రబాబు జిల్లాల పర్యటనలకు వెళ్లినప్పుడు ఖచ్చితంగా కార్యకర్తలతో సమావేశమవుతున్నారు. వారికి ప్రాధాన్యత ఉంటుందని పదే పదే గుర్తు చేస్తున్నారు. ఎమ్మెల్యేలకు కూడా కార్యకర్తల ఎదుటే వార్నింగ్ లు ఇస్తున్నారు. కార్యకర్తలను విస్మరిస్తే వచ్చే ఎన్నికల్లో టిక్కెట్ కూడా ఉండదని హెచ్చరికలు జారీ చేస్తూ క్యాడర్ జారి పోకుండా అన్ని రకాల చర్యలు తీసుకుంటున్నారు. సీనియర్ నేతలను పక్కన పెట్టి యువతకు ప్రాధాన్యమిస్తామని కేవలం మాటల ద్వారా కాకుండా చేతల ద్వారా చూపుతూ యువతను ఆకట్టుకునే ప్రయత్నిస్తున్నారు. పార్టీలో యువనాయకత్వాన్ని మరింతగా ప్రోత్సహించి జోష్ పెంచుతూ ఏడు పదులవయసులోనూ హుషారు రేకెత్తిస్తున్నారు. ఇలా నాలుగు వైపులా చంద్రబాబు వచ్చే ఎన్నికలకు అస్త్రశస్త్రాలను ఇప్పటి నుంచే సిద్ధం చేస్తున్నారు.