TDP : మాగుంటను ముఖ్యమంత్రి చంద్రబాబు మందలించారా?

మాగుంట శ్రీనివాసులు రెడ్డి జగన్ ను మామూలుగా కలిసి వెళితే ఒకే.. కానీ ఆప్యాయంగా ఆయన పలకరించిన తీరు ఇక్కడ తేడా కొడుతుందని టీడీపీ నేతలు చెబుతున్నారు. లాంగ్వేజీ, బాడీ లాంగ్వేజీ డిఫరెంట్ గా ఉన్నాయంటున్నారు. మాగుంట శ్రీనివాసులు రెడ్డి తరచూ పార్టీలు మారుతుండటం ఇందుకు కారణం. రాష్ట్రం విడిపోక ముందు కాంగ్రెస్ పార్టీ తరుపున ఎంపీగా పనిచేసిన మాగుంట శ్రీనివాసులు రెడ్డి తర్వాత టీడీపీలో చేరి ఒంగోలు పార్లమెంటు స్థానినికి పోటీ చేసి ఓటమి పాలయ్యారు. అయితే ఆ ఎన్నికల్లో ఓటమి పాలు కావడంతో టీడీపీ ఎమ్మెల్సీ అయ్యారు. 2019 ఎన్నికల నాటికి వైసీపీలో చేరి తిరిగి ఒంగోలు ఎంపీ అయ్యారు. మళ్లీ 2024కు ముందు టీడీపీలో చేరి ఒంగోలు పార్లమెంటు సభ్యుడిగా ఎన్నికయ్యారు.

జనం నాడిని బట్టి ఆయన ప్రయాణం సాగుతుందని, అందుకే మాగుంట శ్రీనివాసులు రెడ్డి జగన్ తో కలవడాన్ని తప్పుపట్టాల్సి వస్తుందని టీడీపీ నేతలు సయితం అంటున్నారు. కానీ పారిశ్రామికవేత్త కావడంతో పాటు గతంలో ఆ పార్టీ తరుపున ఎంపీగా ఎన్నిక కావడం వల్లనే కేవలం పలకరింపుతోనే సరిపెట్టారని మాగుంట అనుచరులు చెబుతున్నారు. మరొకవైపు మాగుంట శ్రీనివాసులు రెడ్డి తాను వచ్చే ఎన్నికల్లో పోటీ చేయబోనని ఇప్పటికే ప్రకటించారు. తన కుమారుడు మాగుంట రాఘవరెడ్డి పోటీ చేస్తారని ప్రకటించారు. కేవలం కాకతాళయంగానే కలసిన ఘటనగానే చూడాలని అంటున్నారు. తెలుగు తమ్ముళ్లు మాత్రం పార్టీ నాయకత్వం మాగుంట శ్రీనివాసులు రెడ్డిపై చర్యలు తీసుకోవాలని కోరుతున్నారు. అయితే ఢిల్లీ పర్యటనలో ఉన్న చంద్రబాబు మాగుంటతో ఇలాంటివి తప్పుడు సంకేతాలు వెళతాయని చెప్పినట్లు తెలిసింది.