Chandrababu : చంద్రబాబు అసలు వ్యూహం అదేనా? దీంతో జగన్ ఆటకట్టినట్లేనా?

2028 నాటికి మూడేళ్ల కాలం పూర్తవుతుంది. అందుకే త్వరగా పనులకు టెండర్లు పిలవడంతో పాటు వాటి పనులను సత్వరమే పూర్తి చేయాలని ఎప్పటికప్పడు మంత్రి నారాయణతో పాటు సీఆర్డీఏ అధికారులను హెచ్చరిస్తున్నారు. అనుకున్న సమయానికి ఇప్పుడు చేపట్టిన పనులు పూర్తి చేసిన తర్వాత మాత్రమే ఎన్నికలకు వెళ్లాలన్నది చంద్రబాబు ఆలోచన. అప్పుడే కూటమి ప్రభుత్వంపై నమ్మకం ఏర్పడుతుందని చంద్రబాబు గట్టిగా విశ్వసిస్తున్నారు. అయితే వాతావరణం కూడా ఈ పనుల నిర్వహణకు సహకరించాల్సి ఉంటుంది. మూడేళ్లలో ఎనిమిది నెలలు వానలతో సరిపోతాయి. ఇక మిగిలేది 28 నెలలు మాత్రమే మిగిలి ఉంటాయి. అందుకే శీతాకాలం, వేసవి కాలంలో పనులు వేగంగా జరగాలని చంద్రబాబు పదే పదే అధికారులను ఆదేశిస్తున్నారు.

మరొకవైపు సంక్షేమ పథకాలను అమలు చేసేందుకు అవసరమైన నిధుల సమీకరణ విషయంలో ఆయన తలమునలవుతున్నారు. ఇచ్చిన సూపర్ సిక్స్ హామీలను అమలు చేయడానికి శతవిధాలా ప్రయత్నిస్తున్నారు. ఇప్పటికే సూపర్ సిక్స్ హామీల్లో ప్రధానమైన వాటిని అమలు చేశామన్న భావనలో ఉన్నారు. మిగిలిన వాటిని కూడా వచ్చే ఏడాదికి పూర్తి చేసి పూర్తిగా చేశామని ప్రజల్లోకి వెళ్లాలని అనుకుంటున్నారు. దీని వల్ల స్థానిక సంస్థల ఎన్నికల్లో కూడా కూటమి పార్టీలకు రాజకీయంగా ప్రయోజనం ఉంటుందన్న అంచనాలో ఉన్నారు. అందుకే మిగిలిపోయిన హామీలను వెంటవెంటనే పూర్తి చేసి స్థానిక సంస్థల ఎన్నికలకు వెళ్లాలన్న యోచనలో ఉన్నట్లు తెలిసింది.

దీంతో పాటు జోనల్‌ వ్యవస్థ ఏర్పాటుకు నిర్ణయం తీసుకున్నారు. విశాఖ, అమరావతి, రాయలసీమ జోన్‌ల ఏర్పాటు చేయాలని నిర్ణయించారు. విశాఖ రీజియన్‌లో 9 జిల్లాలు, అమరావతిలో 8 జిల్లాలు, రాయలసీమ జోన్‌లో 9 జిల్లాలు ఉండనున్నాయి. మూడు ప్రాంతాల అభివృద్ధి తమ ప్రభుత్వ లక్ష్యమని ప్రజల్లోకి బలంగా తీసుకెళ్లే ప్రయత్నం చేస్తున్నారు. నీతి ఆయోగ్, సింగపూర్ సంస్థల ఆధ్వర్యంలో ప్రణాళికలు రూపొందిస్తున్నారు. సీఎం చంద్రబాబు సారథ్యంలో స్టీరింగ్ కమిటీ ఏర్పాటయింది. ఒక్కో జోన్‌కు సీఈవోగా సీనియర్ ఐఏఎస్ అధికారులను నియమించారు. విశాఖ జోన్‌కు సీఈవోగా యువరాజ్. అమరావతి జోన్‌కు సీఈవోగా మీనా, రాయలసీమకు సీఈవోగా కృష్ణబాబు నియామకం చేశారు. నేడు, రేపట్లో ఉత్తర్వులు వెలువడనున్నాయి. ఇలా అన్ని అస్త్రాలతో చంద్రబాబు వచ్చే ఎన్నికలకు నాటికి సిద్ధమవుతున్నట్లే కనిపిస్తుంది.