Andhra Pradesh : కొత్త సీఎస్ విజయానంద్ .. కారణాలు బలమైనవేనట

అయితే సీనియారిటీ ప్రాతిపదికన మొదట జలవనరుల శాఖ ప్రత్యేక సీఎస్ సాయిప్రసాద్ పేరు వినిపించినప్పటికీ.. ఆయన్ను నియమిస్తే ఆయన పదవీకాలం ముగిసేలోగా విజయానంద్ పదవీ విరమణ చేస్తారు. అందువల్ల విజయానంద్ కు ముందుగా అవకాశం ఇవ్వాలని చంద్రబాబు నిర్ణయించారు. తెలుగుదేశం పార్టీ అధికారంలోకి వచ్చినప్పుడల్లా చంద్రబాబు సీఎస్ విషయంలో సీనియారిటీకే ప్రాధాన్యత ఇస్తారన్నది గతంలోనూ అనేక సార్లు స్పష్టం కావడంతో విజయానంద్ పేరుకే చంద్రబాబు టిక్ పెట్టినట్లు సమాచారం. వచ్చే ఏడాది నవంబరులో ఆయన రిటైరయ్యాక సాయిప్రసాద్ ను చీఫ్ సెక్రటరీ గా నియమించాలని ముఖ్యమంత్రి చంద్రబాబు నిర్ణయానికి వచ్చారు.

దీంతో తన హయాంలో ఇద్దరికీ అవకాశం ఇచ్చినట్లవుతుందని చంద్రబాబు భావిస్తున్నారు. విజయానంద్ కడప జిల్లాకు చెందిన వ్యక్తి. 1992 ఐఏఎస్ బ్యాచ్ కు చెందిన అధికారి. బీసీ కులానికిచెందిన వారు. యాదవ సామాజిక వర్గానికి చెందిన విజయానంద్ కు చీఫ్ సెక్రటరీగా అవకాశం కల్పించి బీసీలకు ప్రాధాన్యత ఇచ్చినట్లవుతుందని కూడా చంద్రబాబు భావిస్తున్నారు. చీఫ్ సెక్రటరీ ఎంపిక తనకు పాలనాపరంగా మాత్రమే కాకుండా రాజకీయంగా కూడా ఉపయోగపడుతుందని చంద్రబాబు భావించి ఈ నిర్ణయం తీసుకున్నట్లు చెబుతున్నారు. తర్వాత కమ్మ సామాజిక వర్గానికి చెందిన సాయిప్రసాద్ కు అవకాశమిస్తే బాగుంటుందని కూడా ఆయన భావిస్తున్నారని ఐఏఎస్ అధికారులే చెవులు కొరుక్కుంటున్నారు. సీనియారిటీ ప్రాతిపదిక తీసుకుంటే 1990 బ్యాచ్ కు చెందిన అనంతరాముకు ఇవ్వాల్సిఉంది. అయితే ఆయన కర్ణాటక రాష్ట్రానికి చెందిన వారు కావడంతో ఆయన పేరు వెనక్కు వెళ్లిందన్న ప్రచారం జరుగుతుంది. అలాగే 1991 సుమితా దావ్రా కూడా కేంద్ర సర్వీసుల్లో ఉండటంతో దావ్రా పేరు కూడా పరిశీలనకు లేకుండా పోయింది. మొత్తం మీద తదుపరి చీఫ్ విజయానంద్ అన్నది ఖాయమైనట్లే.