Andhra Pradesh : కూటమి సర్కార్ ఆ ధైర్యం చేస్తుందా? వదిలేస్తుందా?

కొందరు ఎమ్మెల్యేలు సభకు రాకుండా రిజిస్టర్ లో సంతకాలు చేసి వెళ్లిపోతున్నారని ఇటీవల ఎథిక్స్ కమిటీ కూడా ఆరోపించింది. సభకు రాకుండా రిజిస్టర్ లో సంతకాలు చేసి వేతనాలు కొందరు ఎమ్మెల్యేలు తీసుకోవడంపై ఎథిక్స్ కమిటీ అభ్యంతరం చెప్పింది. దాదాపు ఆరుగురు వరకూ ఇలాంటి ఎమ్మెల్యేలున్నారని చెబుతున్నారు. అయితే జగన్ మాత్రం వేతనం తీసుకోవడం లేదని స్పీకర్ అయ్యన్న పాత్రుడు ప్రకటించారు. కానీ వరసగా అసెంబ్లీ సమావేశాలకు హాజరు కాకపోతే వారిపై అనర్హత వేటు వేయవచ్చని శాసనసభ నిబంధనలు చెబుతున్నాయి. ఆ నిబంధనలను ఉపయోగించుకుని అసెంబ్లీకి రాని ఎమ్మెల్యేలపై వేటు వేస్తారంటున్నారు.

ఎమ్మెల్యేగా ఎన్నికయిన తర్వాత కనీసం అరవై పనిదినాలు అసెంబ్లీ సమావేశాలకు హాజరు కావాల్సి ఉంటుందని నిబంధనలు చెబుతున్నాయి. లేకుంటే వారిపై అనర్హత వేటు వేసే అవకాశముంది. ఇటీవల శాసనసభ డిప్యూటీ స్పీకర్ రఘురామ కృష్ణ రాజు కూడా అసెంబ్లీకి రాని ఎమ్మెల్యేలపై అనర్హత వేటు వేస్తామని హెచ్చరించారు. అయితే అనర్హత వేటు అనేది రాజకీయంగా తీసుకోవాల్సిన అంశం. ఒక్కసారి అన్ని ఉప ఎన్నికలు జరిపేందుకు ప్రభుత్వం సన్నద్ధంగా ఉందా? అన్నది చూడాలి. అలాగే అదే సమయంలో ఒక్కసారి అంతమందిపై అనర్హత వేటు వేసి ఉప ఎన్నికలకు వెళితే సానుభూతి వెల్లువెత్తే అవకాశముంటుంది. అందుకే హెచ్చరించి వదిలేస్తారా? లేక ధైర్యం చేస్తారా? అన్నది చూడాల్సి ఉంది.