Chandrababu : నాయుడు గారి శ్రమ.. ఫలిస్తుందా? భిన్నమైన పరిస్థితులు

గతంలో ఉమ్మడి ఆంధ్రప్రదేశ్ ముఖ్యమంత్రిగా ఉన్నప్పడు హైదరాబాద్ ను అభివృద్ధి చేయడానికి చంద్రబాబు నాయుడు పెద్దగా కష్టపడాల్సిన పనిలేకపోయింది. అందుకు వాతావరణ పరిస్థితులతో పాటు పారిశ్రామికంగా, వైద్య పరంగా అభివృద్ధి చెందిన నగరం హైదరాబాద్ కావడంతో పాటు నిజాం కాలం నుంచే హైదరాబాద్ ప్రత్యేకతను సంతరించుకోవడంతో చంద్రబాబు నాయుడు ఆలోచనలు, కార్యాచరణ కొంత ముందడుగు పడ్డాయి. హైదరాబాద్ లో పెద్ద కష్టం లేకుండా చంద్రబాబు నాయుడు సైబరాబాద్ ను నిర్మాణం చేశానని ఇప్పటికీ చెప్పుకుంటున్నారంటే అందుకు స్థల మహత్యం కూడా కారణమని చెప్పక తప్పదు. హైదరాబాద్ గత నలభై ఏళ్ల నుంచి పాలకులు ఎవరున్నా డెవలెప్ మెంట్ మాత్రం ఆగలేదు.

ఇక అమరావతికి వచ్చే సరికి పూర్తి భిన్నమైన పరిస్థితి. సరైన రాజధాని లేదు. రాజధాని నిర్మాణం ఇంకా మొదలు కాలేదనే చెప్పాలి. గత ప్రభుత్వం మూడు రాజధానుల నిర్మాణం ప్రతిపాదన ముందుకు తేవడంతో గత పదేళ్ల నుంచి రాజధాని నిర్మాణం సాగడం లేదు. ఇప్పుడిప్పుడే పనులు మొదలవుతున్నాయి. రాజధాని నిర్మాణంలో మొదటి దశ పనులు పూర్తి కావాలంటే దాదాపు మూడేళ్లకు పైగానే సమయం పడుతుంది. ఇప్పటికే ఒక ఏడాది గడిచిపోయింది. మరో మూడేళ్లలో వరుణుడు, ప్రకృతి అనుకూలిస్తే పనులు సజావుగా సాగుతాయి. లేకుంటే మరింత ఆలస్యమయ్యే అవకాశాలు లేకపోలేదు. అందుకే చంద్రబాబు నాయుడు అనుకున్న లక్ష్యానికి ఇంకా దూరంగానే ఉన్నారని చెప్పాలి.