Weather Report : మే నెలను తలిపిస్తున్న జూన్... మరోవైపు వర్షం కూడా

ఉత్తరకోస్తా, దక్షిణ కోస్తాలోని కొన్ని ప్రాంతాల్లో ఈరోజు తేలికపాటి నుంచి మోస్తరు వర్షాలు పడతాయని వాతావరణ కేంద్రం తెలిపింది. కొన్ని ప్రాంతాల్లో చిరుజల్లులు పడే అవకాశముందని పేర్కొంది. అంతే కాకుండా బలమైన ఈదురుగాలులు వీస్తాయని, గంటకు నలభై నుంచి యాభై కిలోమీటర్ల వేగంతో ఈదురుగాలులు వీచే అవకాశముందని చెప్పింది. కొన్ని చోట్ల భారీ వర్షాలు పడే అవకాశముందని, అయితే అందుకు తక్కువ అవకాశాలున్నాయని తెలిపింది. ఉష్ణోగ్రతల దృష్ట్యా ప్రజలు పగటి వేళ తగిన జాగ్రత్తలు పాటించాలని వాతావరణ శాఖ అధికారులు సూచించారు. ఎండ తీవ్రత రాయలసీమలోని కొన్ని జిల్లాల్లో ఎక్కువగా ఉండే అవకాశముందని వాతావరణ కేంద్రం తెలిపింది.

తెలంగాణలోనూ మరో మూడు రోజుల పాటు తేలికపాటి నుంచి మోస్తరు వర్షాలు పడతాయని హైదరాబాద్ వాతావరణ కేంద్రం తెలిపింది. అలాగే తెలంగాణలోనూ భిన్నమైన వాతావరణం నెలకొంటుందని చెప్పింది. ఉదయం పది గంటల నుంచి మధ్యాహ్నం నాలుగు గంటల వరకూ ఎండల తీవ్రత ఎక్కువగా ఉంటుందని, తర్వాత వర్షం పడే అవకాశముందని తెలిపింది. ప్రధానంగా హైదరాబాద్, రంగారెడ్డి, మహబూబ్ నగర్, వరంగల్, ఖమ్మం, నల్లగొండ, మెదక్ జిల్లాల్లో తేలికపాటి నుంచి మోస్తరు వర్షాలు పడతాయని హైదరాబాద్ వాతావరణ కేంద్రం తెలిపింది. ఇదే సమయంలో బలమైన ఈదురుగాలులు కూడా వీస్తాయని, గంటకు ముప్ఫయి నుంచి నలభై కిలోమీటర్ల వేగంతో ఈదురుగాలులు వీచే అవకాశముందని చెప్పింది.