CM Ramesh : సీఎం రమేష్ కు శత్రువులు ఎక్కడో లేరుగా?

నిజామాబాద్ పార్లమెంటు సభ్యుడు ధర్మపురి అరవింద్ ఇప్పటికి రెండు సార్లు బీజేపీ ఎంపీగా గెలిచారు. ఆయన తన తండ్రి ధర్మపురి శ్రీనివాస్ కాంగ్రెస్ లో ఉన్నా, బీఆర్ఎస్ లో ఉన్నప్పటికీ అరవింద్ బీజేపీని ఎంచుకున్నారు. నిజామాబాద్ టిక్కెట్ ను పొంది 2019, 2024 ఎన్నికల్లో విజయం సాధించారు. ఇప్పుడు ధర్మపురి అరవింద్ సొంత పార్టీ ఎంపీ సీఎం రమేష్ పరువు తీశారు. ఒక టీవీ ఛానల్ లో ఆయన మాట్లాడుతూ సీఎం రమేష్ కు అంత సీన్ లేదని తేల్చి చెప్పడం ఇప్పుడు తెలంగాణలోనే కాదు. ఏపీలోనూ చర్చనీయాంశమైంది. సీఎం రమేష్ ఇటీవల బీఆర్ఎస్ వర్కింగ్ ప్రెసిడెంట్ కేటీఆర్ పై విమర్శలు చేశారు. రేవంత్ రెడ్డి నుంచి పెద్దయెత్తున కాంట్రాక్టులు పొందేందుకు సీఎం రమేష్ ఆయనకు సహకరించారంటూ కేటీఆర్ ఆరోపించారు.

దీనిపై సీఎం రమేష్ మాట్లాడుతూ బీజేపీలో బీఆర్ఎస్ ను విలీనం చేయడానికి కేటీఆర్ తన వద్దకు వచ్చాడని, తాను అది పెద్దలు తీసుకోవాల్సిన నిర్ణయమని చెప్పానని అన్నారు. తాను గతంలో కేటీఆర్ గెలుపు కోసం నిధులు కూడా ఇచ్చానని సీఎం రమేష్ బహిరంగంగానే చెప్పారు. అయితే ధర్మపురి అరవింద్ మాత్రం సీఎం రమేష్ వ్యాఖ్యలను ఖండించారు. బీజేపీ లో బీ ఆర్ ఎస్ విలీనం ప్రతిపాదన ఏది లేదని అరవింద్ తేల్చి చెప్పారు. టీడీపీ నుండి వచ్చినాయన.. పక్క రాష్ట్రం ఎంపీతో మాట్లాడటానికి కేటీఆర్ ఏమైనా పిచ్చోడా..? అంటూ వెటకారం చేశారు. ఆయన ఏజ్ ఎంత?... బీజేపీలో ఆయన స్థాయి ఏంటి? ఆయనతో ఎందుకు మాట్లాడతారంటూ? సీఎం రమేష్ పై తీవ్ర వ్యాఖ్యలు చేయడం ఇప్పడు సోషల్ మీడియాలో వైరల్ అయింది. మరి దీనికి సీఎం రమేష్ ఎలా స్పందిస్తారన్నది చూడాలి.