ఏపీలో పదవ తరగతి పరీక్ష పేపర్ లీక్ అంటూ వార్తలు.. నిజమిదే..!

ఇలాంటి సమయంలో పదో తరగతి పరీక్షలకు సంబంధించి.. పరీక్షా పత్రం లీక్‌ అయిందని వదంతులు రావడంతో అధికారులు అప్రమత్తమయ్యారు. చిత్తూరు జిల్లాలో లీక్‌ విషయమై పుకార్లు వ్యాపించడంతో అధికారులు సమాచారం కోసం పరుగులు తీస్తున్నారు. జిల్లా కలెక్టర్‌ హరినారాయణన్‌ దృష్టికి విషయం వెళ్లడంతో ఆయన విద్యాశాఖ అధికారులకు తగు ఆదేశాలు జారీ చేశారు. ఈ వదంతులను సృష్టించిన వారిపై డీఈవో పురుషోత్తం చిత్తూరు ఎస్పీకి ఫిర్యాదు చేయనున్నట్లు వెల్లడించారు. జిల్లాలో పరీక్షా పత్రం లీక్‌ అయినట్లు వచ్చిన వదంతులు నమ్మవద్దని చిత్తూరు జిల్లాలో పరీక్షలు ప్రశాంతంగా జరుగుతున్నాయని కలెక్టర్‌ తెలిపారు.

పదో తరగతి పరీక్షలు నిర్దేశిత తేదీల్లో రోజూ ఉదయం 9.30 నుంచి 12.45 గంటల వరకు జరుగుతాయి. విద్యార్థులు ఉదయం 8.30 గంటలకల్లా పరీక్ష కేంద్రాలకు చేరుకోవాలి. పరీక్ష కేంద్రాల్లోకి 9.30 గంటల వరకు అనుమతిస్తామని.. ఆ తర్వాత ఎవరినీ లోపలకు అనుమతించబోమని ప్రభుత్వ పరీక్షల డైరెక్టర్‌ డి.దేవానందరెడ్డి తెలిపారు.