Weather Report : క్యుములోనింబస్ మేఘాలు.. వానలు ఇక్కడే కురుస్తాయట

ఆంధ్రప్రదేశ్ లో ఈరోజు కూడా వానలు పడతాయని అమరావతి వాతావరణ శాఖ వెల్లడించింది. అయితే కొన్ని ప్రాంతాల్లో మాత్రమే తేలికపాటి నుంచి మోస్తరు వర్షాలు పడతాయని పేర్కొంది. కొన్ని ప్రాంతాల్లో పిడుగులు పడే అవకాశముందని కూడా హెచ్చరించింది. రైతులు, కూలీలు, పశువుల కాపర్లు పొలాలకు వెళ్లిన సమయంలో చెట్ల కింద నిలబడకుండా జాగ్రత్తలు తీసుకోవాలని హెచ్చరించారు. రాయలసీమ జిల్లాలోని కొన్ని ప్రాంతాల్లో వానలు పడతాయని పేర్కొంది. అలాగే ఉత్తరాంధ్రలో కొన్ని చోట్ల మోస్తరు వర్షాలు పడతాయని కూడా చెప్పింది.

తెలంగాణలోనూ నేడు వానలు పడే అవకాశముందని హైదరాబాద్ వాతావరణ శాఖ తెలిపింది. క్యుములో నింబస్ మేఘాల ప్రభావంతో వానలు పడతాయని వాతావరణ శాఖ వెల్లడించింది. భద్రాద్రి కొత్తగూడెం, వరంగల్, కరీంనగర్ వంటి జిల్లాల్లో తేలిక పాటి వర్షాలు పడతాయని, నాగర్ కర్నూలు, ఖమ్మం జిల్లాల్లో మోస్తరు వానలు పడతాయని వాతావరణ శాఖ తెలిపింది. హైదరాబాద్ నగరంలోనూ తేలికపాటి జల్లులు పడే అవకాశముందని చెప్పింది. నైరుతి బంగాళాఖాతం నుంచి ఉత్తర కేరళ వరకూ తమిళనాడు మీదుగా ఆవర్తన ద్రోణి కొనసాగుతుందని, ఈ ప్రభావంతో తేలికపాటి జల్లులు పడే అవకాశముందని పేర్కొంది. పలు జిల్లాలకు ఎల్లో అలెర్ట్ ను వాతావరణ శాఖ జారీ చేసింది.