Amaravathi : భూములు కొనేవారు లేరట.. నెవర్ ఎండింగ్ ల్యాండ్ పూలింగ్

ఆంధ్రప్రదేశ్ రాజధాని అమరావతి నిర్మాణం కోసం రెండో విడత భూసమీకరణకు నోటిఫికేషన్ విడుదలయింది. మూడో విడత భూ సమీకరణ కూడా ఉంటుందని మున్సిపల్ మంత్రి నారాయణ ప్రకటించారు. దీంతో రాజధాని రైతుల్లో ఆందోళన పెరిగింది. ఎన్ని విడతలుగా భూ సమీకరణ ఉంటుందో? ఏ ఏ గ్రామాల నుంచి భూమిని సేకరిస్తుందన్న అలజడి మొదలయింది. ఇప్పటికే మొదటి విడతగా 34 వేల ఎకరాలను 29 వేల మంది రైతుల నుంచి ల్యాండ్ పూలింగ్ కింద తీసుకున్న ప్రభుత్వం ఇప్పటి వరకూ రైతులకు ఇచ్చిన ప్లాట్లను అభివృద్ధి చేసి ఇవ్వలేదు. సీఆర్డీఏ అధికారులు కూడా సరైన సమాధానాలు చెప్పకపోవడంతో నేరుగా ముఖ్యమంత్రి చంద్రబాబు వారిని సముదాయించాల్సిన పరిస్థితి తలెత్తింది.