Amaravathi : అమరావతిపై అసత్య ప్రచారంలో వాస్తవమెంత?.. నిజానిజాలేమిటి?

ఉండవల్లి వద్ద పొలాలు కూడా ముంపునకు గురయ్యాయి. అయితే జాతీయ రహదారితోపాటు అంతర్గత రోడ్ల నిర్మాణ సమయంలో వేసిన మట్టికట్టలు నీటి ప్రవహాన్ని అడ్డుకున్నాయి. బయటకు వెళ్లే మార్గం లేకుండా పోయింది. అందువల్లనే అమరావతి ఎక్కడినీరు అక్కడే నిలిచిపోయింది. అయితే నీరు ఎందుకు నిలిచిపోయిందో గుర్తించే అంశంలో అధికారులు తగిన శ్రద్ధ చూపకపోవడంతో ఎక్కడికక్కడే నిలిచిపోయింది. బయటకు వెళ్లే మార్గాన్ని కూడా గుర్తించలేకపోయారు. ఇదే సమయంలో నీటిని బయటకు మళ్లించడంపై వెంటనే మంత్రి నారాయణతో పాటు అధికారులు దృష్టిపెట్టారు. జాతీయ రహదారి దిగువున నీరు వెళ్లేందుకు కాలువ తవ్వడంతో నిలిచిన నీరు వెళ్లిపోయింది.

నీరు వెళ్లే మార్గాలను మంత్రి నారాయణతోపాటు, సీఆర్‌డీఏ అధికారులు రెండురోజులపాటు పర్యవేక్షించారు. నీరు తగ్గిపోవడంతో అందరూ అధికారులు ఊపిరి పీల్చుకున్నారు. తొలుతే సమస్యను గుర్తించి ఉంటే నీరు వేగంగా బయటకు వెళ్లేదని రైతులు చెబుతున్నప్పటికీ పట్టించుకోకపోవడంతో అమరావతిలో నీరు నిలిచిందంటున్నారు. అయితే జిఏడి టవర్లలో అక్కడక్కడ పనుల కోసం తవ్విన గుంటల్లోనూ నీరు నిలిచిపోయింది. వాటిని తోడేందుకు అధికారుల ప్రయత్నిస్తున్నారు. త్వరలోనే మొత్తం సమస్య పరిష్కారం అవుతుందని సీఆర్డీఏ కమిషనర్‌ కన్నబాబు తెలిపారు. అమరావతి రాజధానిలో నీరు నిలిచిపోవడానికి గల కారణాలను తెలుసుకోకుండా అసత్య ప్రచారం మానుకోవాలని, అభివృద్ధిని అడ్డుకునే ప్రయత్నం ఇకనైనా మానుకోవాలని సూచిస్తున్నారు.