ଫ୍ୟାକ୍ଟ ଚେକ୍: ଆନ୍ଧ୍ର ପ୍ରଦେଶ ପୋଲିସ ମାଡ଼ ମାରିବାର ଭାଇରାଲ ଭିଡିଓକୁ ଉତ୍ତର ପ୍ରଦେଶର ଘଟଣା ବୋଲି ଭୁଲ ଦାବି ସହ ସେୟାର କରାଯାଇଛି

ପୋଲିସ୍ ଜନତା ମଧ୍ୟରେ ସୁସମ୍ପର୍କ ସ୍ଥାପନ ପାଇଁ ସରକାର ଯେତେ ଅଣ୍ଟା ଭିଡ଼ିଲେ ମଧ୍ୟ କୌଣସି ନା କୌଣସି କାରଣରୁ ଏକ ଶୁନ୍ୟସ୍ଥାନ ରହିଯାଉଛି । କେତେବେଳେ ପୋଲିସ୍ ର ବର୍ବର କାଣ୍ଡ ତ କେତେବେଳେ ଗୋଷ୍ଟି ଆକ୍ରମଣରେ ପୋଲିସ୍ ଲହୁଲୁହାଣ । କିଛି ଏଭଳି ଅପ୍ରିତିକର ପରିସ୍ଥିତି ହେତୁ ପୋଲିସ୍ ଏବଂ ଜନତା ମଧ୍ୟରେ ସେହି ଶୂନ୍ୟ ସ୍ଥାନଟି ଦିନକୁ ଦିନ ବଢ଼ିବାରେ ଲାଗିଛି ।

ଇତିମଧ୍ୟରେ ଏକ ଭିଡିଓ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ଭାଇରାଲ ଭିଡିଓରେ ହଳଦିଆ ରଙ୍ଗର ଗଞ୍ଜି ପିନ୍ଧି ଜଣେ ଯୁବକ ତଳେ ବସିଥିବା ବେଳେ । ଦୁଇଜଣ ପୋଲିସ୍ ଯୁବକଙ୍କୁ ପିଟୁଥିବାର ଦେଖାଯାଇଛି । ଜଣେ ପୋଲିସ୍ ଉକ୍ତ ଯୁବକର ପାଦ ଉପରେ ଗୋଡ଼ ରଖିଥିବା ବେଳେ ଆଉ ଜଣେ ପୋଲିସ୍ ଏକ ଲାଠି ସାହାଯ୍ୟରେ ଯୁବକର ଗୋଡ଼କୁ ବାରମ୍ବାର ପିଟୁଥିବାର ଦେଖିବାକୁ ମିଳିଛି ।

ଉକ୍ତ ଘଟଣାଟି ଉତ୍ତର ପ୍ରଦେଶର ବୋଲି ଦାବି ହୋଇଛି । ଉତ୍ତର ପ୍ରଦେଶ ପୋଲିସ୍ ର ଏଭଳି ଅମାନବିକତା କାର୍ଯ୍ୟ ଶୈଳୀ ଉପରେ ପ୍ରଶ୍ନ ଉଠାଇଛନ୍ତି ୟୁଜର୍ସ । ଉକ୍ତ ଘଟଣା ର ତଦନ୍ତ କରିବା ସହ ଉକ୍ତ କର୍ମଚାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବାକୁ ଦାବି ହୋଇଛି ।

ଯାହାର ସ୍କ୍ରିନସଟ୍ ତଳେ ଉପଲବ୍ଧ ରହିଛି ।

ସତ୍ୟାସତ୍ୟ:

ଦାବିରେ ନାହିଁ କୌଣସି ସତ୍ୟତା, ଏଭଳି କୌଣସି ଘଟଣା ନିକଟ ଦିନରେ ଉତ୍ତର ପ୍ରଦେଶରେ ଘଟିନାହିଁ । ଭାଇରାଲ ଭିଡିଓଟି ଆନ୍ଧ୍ରପ୍ରଦେଶ ଅଞ୍ଚଳର ଅଟେ, ତେନାଲି ର ଜଣେ କନେଷ୍ଟବଳକୁ ଆକ୍ରମଣ ଅଭିଯୋଗ ନେଇ ଯୁବକଙ୍କୁ ଦଣ୍ଡ ଦେଉଛି ପୋଲିସ ।

ଉକ୍ତ ଘଟଣା ନେଇ ଅନୁସନ୍ଧାନ କରିବାରୁ ନିକଟ ଦିନରେ ଏଭଳି କୌଣସି ଘଟଣା ଘଟିଥିବାର ସୂଚନା ପାଇନଥିଲୁ । ଯଦି ଏଭଳି କୌଣସି ଘଟଣା ଘଟିଥାନ୍ତା ତେବେ ନିଶ୍ଚିତଭାବେ କୌଣସି ନା କୌଣସି ଗଣମାଧ୍ୟମ ଖବର ପ୍ରସାରିତ କରିଥାନ୍ତେ ।

ଅଧିକ ତଦନ୍ତ କରିବାକୁଯାଇ ଯେତେବେଳେ ଆମେ ଉତ୍ତର ପ୍ରଦେଶର ଜଣେ ଫ୍ରିଲାନ୍ସ ସାମ୍ବାଦିକ ଯୋଗେଶ କୁମାରଙ୍କୁ ଯୋଗାଯୋଗ କରିଥିଲୁ, ତାଙ୍କ ସୂଚନା ଅନୁଯାୟୀ, ' ଏଭଳି କୌଣସି ଘଟଣା ନିକଟରେ ଉତ୍ତର ପ୍ରଦେଶରେ ଘଟିନାହିଁ, ଯଦି ଘଟିଥାନ୍ତା ତେବେ ଏନେଇ ଆମେ ନିଶ୍ଚିତ ଖବର ପ୍ରସାରିତ କରିଥାନ୍ତୁ । ଉତ୍ତର ପ୍ରଦେଶ ସହ ଉକ୍ତଭାଇରାଲ ଭିଡିଓର କୌଣସି ସମ୍ପର୍କ ନଥାଇପାରେ ।

ସେହିପରି ଭାଇରାଲ ଭିଡିଓକୁ ଅନୁଧ୍ୟାନ କରି ଦେଖିବାରୁ ପୋଲିସ୍ କର୍ମଚାରୀଙ୍କ ୟୁନିଫର୍ମରେ ଯେଉଁ ଚିହ୍ନ ରହିଛି ତାହା ଉତ୍ତର ପ୍ରଦେଶ ପୋଲିସ୍ ଠାରୁ ସମ୍ପୂର୍ଣ୍ଣ ଭିନ୍ନ ଅଟେ ।

ଯେତେବେଳେ ଆମେ ପୋଲିସ୍ ପୋଷାକରେ ଥିବା ଚିହ୍ନକୁ ନେଇ ତଦନ୍ତ କରିଥିଲୁଉକ୍ତ ଚିହ୍ନଟି ଆନ୍ଧ୍ରପ୍ରଦେଶ ପୋଲିସ୍ ସହ ସମ୍ପୂର୍ଣ୍ଣ ଭାବେ ମେଳ ଖାଇଥିଲା ।

ତେଣୁ ଅନୁମାନ କରାଯାଏ ଯେ, ଭାଇରାଲ ଭିଡିଓଟି ଉତ୍ତର ପ୍ରଦେଶର ନହୋଇଥାଇ ପାରେ ।

ଅନୁସନ୍ଧାନ କରିବାକୁ ଯାଇ ଭାଇରାଲ ଭିଡିଓର କିଛି ଅଂଶକୁ ନେଇ ରିଭର୍ସ ଇମେଜରେ ଅନୁସନ୍ଧାନ କରିବାରୁ କିଛି ଗଣମାଧ୍ୟମରେ ଉକ୍ତ ଘଟଣା ନେଇ ଖବର ପ୍ରସାରିତ ହୋଇଥିବାର ଦେଖିବାକୁ ପାଇଥିଲୁ ।

ଉକ୍ତ ଭିଡିଓ ଗୁଡ଼ିକରେ ଉକ୍ତ ଘଟଣାଟି ଆନ୍ଧ୍ରପ୍ରଦେଶର ବୋଲି ଖବର ପ୍ରସାରଣ ହୋଇଥିବାର ଦେଖିବାକୁ ମିଳିଥିଲା ।

ସେହିପରି ୮ ମଇ ୨୦୨୫ରେ ଏନଡିଟିଭି ଉକ୍ତ ଘଟଣାକୁ ନେଇ ଏକ ବିଶୃତ ଖବର ପ୍ରସାରିତ କରିଥିଵାର ଦେଖିବାକୁ ମିଳିଛି ।

ଖବର ପ୍ରସାରଣ କରି ଏନଡିଟିଭି ଉଲ୍ଲେଖ କରିଛି ।

ଆନ୍ଧ୍ରପ୍ରଦେଶର ତେନାଲିରେ ତିନି ଜଣ ପୁରୁଷ, ରାସ୍ତାଉପରେ ବସିଥିବା ବେଳେ । ଅନେକ ପୋଲିସ ସେମାନଙ୍କୁ ଘେରି ରହିଛନ୍ତି । ପୋଲିସ ସେମାନଙ୍କୁ ଶିକ୍ଷା ଦେବା ପାଇଁ ସର୍ବସାଧାରଣରେ ପିଟିଛନ୍ତି । ତିନି ଜଣ ବ୍ୟକ୍ତିଙ୍କ ନାମ ହେଉଛି: ଭିକ୍ଟର, ବାବୁଲାଲ ଏବଂ ରାକେଶ ଯେଉଁମାନେ ସ୍ଥାନୀୟ ଡନ୍ ଲଡ୍ଡୁଙ୍କ ଅନୁଗାମୀ ଏବଂ ଏକ ମାସ ପୂର୍ବରୁ ନିଶାସକ୍ତ ଅବସ୍ଥାରେ ଆଇତାନଗରରେ ଚିରଞ୍ଜିବୀ ନାମକ ଜଣେ ପୋଲିସ କନଷ୍ଟେବଳଙ୍କୁ ଆକ୍ରମଣ କରିଥିବା ଜଣାପଡ଼ିଛି ।

ଅନ୍ୟପଟେ ଉକ୍ତ ଘଟଣାକୁ ନିନ୍ଦା କରିବାକୁ ଯାଇ ଆନ୍ଧ୍ରପ୍ରଦେଶ ସରକାରଙ୍କ ଉପରେ ବର୍ଷିଛନ୍ତି ପୂର୍ବତନ ମୁଖ୍ୟମନ୍ତ୍ରୀ ୟାଇ ଏସ ଜଗନ ମୋହନ ରେଡ୍ଡୀ । ନିଜ ସୋସିଆଲ ମିଡିଆରେ ଉକ୍ତ ଭିଡିଓ ସେୟାର କରି ଚନ୍ଦ୍ରବାବୁ ସରକାରଙ୍କୁ ଘେରିଛନ୍ତି ଜଗନ୍ ।

ତେଣୁ ଏଥିରୁ ପ୍ରମାଣିତ ହେଲା ଯେ, ଦାବିରେ ନାହିଁ କୌଣସି ସତ୍ୟତା । ଏଭଳି କୌଣସି ଘଟଣା ନିକଟ ଦିନରେ ଉତ୍ତର ପ୍ରଦେଶରେ ଘଟିନାହିଁ । ଭାଇରାଲ ଭିଡିଓଟି ଆନ୍ଧ୍ରପ୍ରଦେଶ ଅଞ୍ଚଳର ଅଟେ, ଯେଉଁଠି ତେନାଲି ର ଜଣେ କନେଷ୍ଟବଳକୁ ଆକ୍ରମଣ ଅଭିଯୋଗ ନେଇ ଯୁବକଙ୍କୁ ଦଣ୍ଡ ଦେଉଛି ପୋଲିସ ।